SHILLONG: East Jaintia Hills a·jani koela a·kolo gimaenggipa manderangoni saksani manggisiko Bristibar salo Indian Navy-ni diver-rang man·dapaha.
Ia koela a·kolo gimaenggipa manderangoni skanggipa manggisiko re·anggipa June 16 tariko Navy-ni diver-rang ra·ongkatna man·ahachim indiba da·onan ia manggisiko darangna ra·ekujaengachim.
Indake ong·engon, ia koela a·kolo gimaenggipa manderangko Indian Navy, National Disaster Response Force (NDRF), State Disaster Response Force (SDRF) aro gipin sipai dolrangba dontonggija sandie, sakgipin mandeni manggisiko Bristibar salo man·dapaha.
Re·anggipa May jani 30 tariko Sutnga Elaka-ni koela a·kolo dynamite boma gopretani ja·man rang·san ia koela a·kolo chi napenba ia koela a·kolo koela bikotenggipa sakbonga manderang gimaahachim.
Ia koela a·kolo gimaenggipa manderangoni sakbride Assam-ni aro saksade Tripura a·dokoni ong·achim.
