TURA: East Garo Hills a·jaoba salantian COVID-19-ko man·giparang batroroengkuani gimin Sukrobar attam 2:00 bajioni a·bachenge June 28 tarik pring 5:00 bajiona kingking East Garo Hills a·jani pilak biaprangon lockdown-ko ra·gatangtaiaha ine East Garo Hills a·jani Deputy Commissioner Swapnil Tembe u·iataha.
Ia lockdown-ko ra·gatanio gari gorarang re·rurana man·jawa aro a·ja damsaoni damgipinona gari aro manderangni re·ruraanikoba champengatangkugen.
Ia lockdown-ko ra·gatanio pilak skul, college, dokkan aro office-rangkoba chipe donanggen indiba sam dokkanrangkode kulina man·gen ine Deputy Commissioner u·iataha.
Ia salrango bank, post office aro private office-rangkoba chipe dontokna nanggen.
Kam nangchongmotana nokoni ong·katengon, mask-rangko ganjringchina, saksa sakgipinoni chel·tangrike dongchina aro rongtal an·talaniko rakkichina gitaba DC u·iataha.
Mande jinmani biaprango aro kam ka·chakram biaprango skatang stujachina aro ta·makkurangko jakkaljachina gitaba DC mikrakataniko on·angaha.
Sorkarini dongimin niamrangko pe·genchimode Epidemic Disease Act 1897-ni Section 2-ni ning·o on·gimin bilrango pangchake dongimin officer-rang, ja·kurangko de·anggen ineba DC mikrakataha.
