TURA: West Garo Hills a·jani Gambegre block-ni ning·o donggipa Dorenggre Non-Govt LP skulo assistant teacher-ni kamna interview ra·ani tarikko jinmana u·iatjaha ine adita sak skigiparang, West Garo Hills a·jani Deputy Commissioner aro Sub-Divisional School Education Officer (SDSEO)-na badi ka·doangaha.
Tura Rongkhon Songgital-oni saksa Greenjust Sangma minggipa mandeni u·iatani gitade, ia Dorenggre Non-Govt LP skulo assistant teacher ba dakchakgipa skigipani kamna skulni president aro school managing committee (SMC), una aro sakgipin skigipana recommend ka·ani chittiko see on·ahachim indiba ia kamna interview ra·ani tarikko songbadrango ba social media-rangoba jinmana u·iatjahani a·sel uamang interview-o dongpana man·jaha.
“Ia kamna interview-ko ra·ani bidingo skulni SMC, songbadrango aro SDSEO office-ni notice board-oba maming u·iatanirangko on·jaha aro ia kam ge·sanan uamang sakgni skigiparangna recommend ka·ani chittirangko on·aha,” ine ia skigiparang parakatenba, iandake kam ge·sanan skigipa sakgnina recommend ka·rongengani a·sel skigiparangni gisepo kajia golmal ong·atronga ine talatangaha.
Ia skigipani kamna gital dake advertisement-ko on·piltaienba, interview-ko ra·piltaichina gitaba ia skigiparang, West Garo Hills a·jani Deputy Commissioner aro SDSEO-ko didiangaha.