TURA: West Garo Hills a·jani a·kawe jolrango donggipa dingtang dingtang biaprang, jekai Tikrikilla, Jugirjhar, Bhangarpar, Pathorkata, Moulakandi, Charbatapara, Chibinang, Phulbari, New Bhaitbari aro Rajabala jolrango Jio, Airtel, Vodafone aro BSNL network-rangko name man·jaenga ine Bristibar salo, All Meghalaya Minority Students Union (AMMSU), West Garo Hills a·jani Deputy Commissioner-na badi ka·e sedoataha.
AMMSU-ni parakatani gitade, ia sal somoirango COVID-19 giproroengani gimin office aro gipin bang·bata kamrangkon internet gitasa ka·na nangenga aro skulrangkoba chipe dontokengani gimin internet gitasa chatro chatrirangna class-rangko ra·tokengachim indiba ia jolrango bang·bata biaprangon network-ko name man·tokjaengani a·sel kamrangko ka·anio aro class-rangko ra·anio neng·nikanirangko chagrongna nangtokenga.
“Re·anggipa May jani 11 tariko West Garo Hills District Administration-ni Facebook page-o, Jio company-ni tower ge·briko Tikrikilla bazar jolrango songdapengaha ine janapahachim indiba da·o ia company-ni network nambatani pal batesa nambatsrangjaengaha aro iani a·selan manderang aro mongsongbate porikkarangko online gita sena nangenggipa chatro chatrirang namen neng·nikanirangko chagrongna nangtokengaha,” ine AMMSU-ni assistant general secretary Ariqul Hoque Azad parakataha.
Iani bidingo jolo songdongenggipa manderang changni chang badi ka·doahachim indiba da·onan network-rangko nambatatna gita maming ja·kurangko de·kujaenga ineba AMMSU-ni assistant general secretary parakataha.
“Uni gimin anga dingtang dingtang porikkarangko internet gita sena nangenggipa chatro chatrirangni pal, ia jolrango network-rangko nambate on·na man·na gita kamrangko niatchina mol·molatenga,” ine AMMSU-ni dilgipa, West Garo Hills a·jani Deputy Commissioner-na sedoataha.
