TURA: West Khasi Hills aro ia jolrango nangchapegipa South Garo Hills a·jani bang·a songrangon, ru·uta salrangonin bijoli dongjae neng·nikanirangko man·tokenga ine West Khasi Hills a·jani United A·chik Youth Federation (UAYF) parakataha.
UAYF-ni parakatani gitade, West Khasi Hills a·jani ning·o donggipa Rengdim Songmong, Matchok Kanram, Nengdawak, Wakpangram, Rengchi, Goreng, Rongtok, Bokchung, Khalu A, Khalu B, Rongsak aro Seningkri-Rangdam songrango jagittam jabri batpile bijoliko man·tokjaenga aro unbaksana ia jolrango nangchapegipa South Garo Hills a·jani ning·o ga·akgipa songrang, jekai Khalu Songmong, Rongcheng aro uandakgipa songrangoba bilsigni batpile bijoliko man·tokgija dongenga.
“Ia songrango indita bilsirangna bijoliko man·jaengani songni dilgiparang, Nongalbibra sub-station-ni SDO office-o aro gipin officer-rangnaba nosto ong·e dongenggipa 11KB power line-ko taripile on·china u·iatahachiim indiba da·alonan Nongalbibra sub-station-ni official-rang, ia songrangna bijoliko on·na man·kujaenga,” ine UAYF-ni general secretary parakatenba, ta·raken ia songrango bijoliko teng·ate on·pilchina MeECL-ni official-rangko didiataha.
