TURA: Dadenggre sub-division-ni ning·o donggipa SSA skigiparangna jagnini dormaharangko on·anio ja·manchakenga ine matnanganirangko dakahani gimin Dadenggre-ni Joint DMC talataniko on·angaha.
Joint DMC-ni talatani gitade, ua kamtangko jako ra·eani adita salrangsan ong·kuengani a·sel aro accountant gitcham kamtangko watangahani a·sel skigiparangna jagnini dormahako on·anio adita ja·manchakna nangengachim.
Gipin a·jarango aro sub-division-rangode SSA skigiparang, jagnini dormaharangko somoi gita man·tokahaoba Dadenggre sub-division-ni ning·o donggipa SSA skigiparangde dormaharangko man·tokkujaenga ine adita salrangna skangsan All Garo Hills SSA School Teachers Association (AGHSSASTA) matnangatahachim ine nikna man·a.
Indake ong·engon, iani bidingo Dadenggre-ni Joint DMC talataniko on·angenba, ua adita salrangna skangsan kamtangko jako ra·eahachim aro kamtangko watanggipa accountant-ni biapo gipinko rakkina man·skakujaengani a·selsa skigiparangna jagnini dormahako on·anio adita ja·manchakna nangengaha ine parakataha.
Dadenggre-ni Joint DMC-na May 25 tarikon dormahani tangkarangko West Garo Hills a·jani Deputy Commissioner aro SSA-ni chairman watatahachim ine AGHSSASTA-ni a·kanganikoba Joint DMC jegalataha aro ia dormahani tangkarangko June 22 tarikosa watatahachim ine talataniko on·angaha.
Indake ong·engon, Dadenggre-ni SSA skigiparangna jagnini dormaharang sokbaahani gimin da·o bill-rangko tarimanaha aro dormaharangko da·o saldokni gisepon skulni account-rango chipatgnok ine Joint DMC parakataha.
