SHILLONG: Meghalaya a·dokni bang·bata biaprangon mikkarang dontonggija waengani gimin chibima sambarango aro chi banronggipa biaprango songdongenggipa manderangko mikrake dongchina a·dokni Disaster Management Minister Kyrmen Shylla u·iataha.
Iani bidingo kobor ra·timgipa manderang baksa agangrikengon, bilsiantian da·o gita wachini somoirango a·arang ruronge aro chirang bane manderang janggirangko gimaatna nangronga aro bang·a nokdangrangan nokgri jamgri ong·atako man·ronga ine Shylla parakatenba, iandakgipa a·selrangna an·tangtangan mikrake dongna man·ode nambata ine didiataha.
Re·anggipa Budbar salosan mikkarang dontonggija waangahani a·sel Garo Hills aro South West Khasi Hills a·jani bang·bata biaprangon a·a be·anirangko aro chi bananirangko nikna man·angahachim.
Official-rangni u·iatani gitade, Budbar salo a·arang be·e aro chirang bane South Garo Hills aro South West Khasi Hills a·jarangoba bang·a manderangan neng·nikanirangko chagrongna nangtokahachim.
South Garo Hills aro South West Khasi Hills a·jarango adita bolni dolongrangkoba chi pe·angahani a·sel da·o manderang re·a doanirango neng·nikanirangko man·tokna nangengahachim.
