Sima-arini mamlani bidingo Cong-ko matnanganina Ampareen aganchaka

SHILLONG: Assam aro Meghalaya a·dokni sima-ario ru·uta salrangna golmal ong·enggipa mamlako Congress dol namatna kam ka·anio chu·sokja ine matnangani namen ong·ja ine Congress-ni a·gipi dilgipa Ampareen Lyngdoh aganaha.
‘‘Political dolrangni, ru·uta salrangna galchipe donenggipa mamlani bidingo daito ra·aniko Congress-kosa matnangode itihas-o batanggimin salrango ong·bagimin kakket obostarangoni gelna miksonganisa ong·enga’’ ine Lyngdoh Sukrobaro aganaha.
Indake, uni aganani gitade politicalni gita ma·ekaoni dipetan Meghalaya aro Assam a·dok damgnini gisepo sima-ariko songjotani bidingo golmal ong·baenga.
‘‘Meghalaya-ni skanggipa a·dok man·chenganiko regional politicalni dilgiparangni jako rang·gitik sima-ariko songjotani bidingo maming ku·rachakani lekka aro map gri pakwataha, indake dal·batgipa adatang Assam-ni sason ka·mitingo ka·sachakanio an·chingni a·dokko watbangalataha’’ ine Lyngdoh aganaha.
Ru·uta salrangna golmal ong·enggipa mamlako Congress dol namatna kam ka·anio chu·sokjaha ine UDP-ni chief adviser matnangaha. Meghalaya, Assam aro ma·mong sorkariko Congress dolni chalaimiting salrangon ia sima-arini mamlako namaona ra·bae bon·atna gita man·achim ine re·anggimin chango UDP-ni chief adviser ong·gipa Bindo Mathew Lanong a·dokni sima-ari mamlani bidingo aganaha.
“Indiba, Congress dol ia mamlako dal·e ra·e ja·ku de·na gita gisik nangjaha. Indake,  bon·kame chanchie nianio Congress dol ia mamlako namatna maming ja·ku de·aniko dakjae chu·sokatjaha ine anga Congress dolko chu·gimik matnangata,” ine UDP-ni chief adviser an·tangni ma·sianiko aganaha.
Indakmitingo, Congress dolni a·gipi dilgipani nikaniode Meghalaya-ni a·dokko man·ani bilsi sotbonga gapna am·aniko maniani sokbaengo MDA sorkari aro uno bakrimgipa dolrang an·tangni daitoni gele kakketko ma·sigija opposition-kosa dos galna gita nangchongmotahakon.
‘‘India a·songko chalaienggipa sorkari a·songni jakgitel ong·ani bilsi 75-ni anniversary-ko manina tarisamsoengo a·songni ning·o donggipa sima-arirangni mamlarangko nipiltaianiko dakenga, indake, da·ode an·ching a·dokni manderangni namgnina kam ka·e a·dokni sima-arini mamlako namgniona ra·bana gita golpogrikaniko dakani MDA aro NDA baksa bakrimgipa sorkari jakosa ong·enga,’’ ine Lyngdoh agandapaha.