TURA: West Garo Hills a·jaoba bang·a manderangan da·o COVID-ni tikarangko su·e ra·tokengahani gimin ru·utbea salrangni ja·man COVID man·giparang sak 500-na bate komiangaha ine nikna man·a.
Ru·utbea salrangna West Garo Hills a·jao COVID man·giparang sak 500 bate dongahaoba Sonibar saloni Robibar salona konta 24-ni gisepo COVID man·e dongenggiparang da·o sak 498-ona tang·onangaha.
“Indita salrangni ja·man an·chingo COVID man·giparang sak 500-na komiangaha,” ine West Garo Hills a·jani Deputy Commissioner Ram Singh parakataha.
Batanggimin somoirango West Garo Hills a·jao COVID-ni a·sel sianganirangko nikna man·ahaoba re·anggipa antiode sianggiparangba dongjaha ine nikna man·aha.
West Garo Hills a·jao COVID man·e dongenggiparang da·o sak 500-na bate komiangahaoba gital man·dapgiparangde komiskakujaenga aro re·anggipa Sonibar saloni Robibar salona konta 24-ni gisepo sak 57 manderang COVID-ko man·daptaiahachim.
Ia apsan salon sak 104 manderang COVID-oni nampilskana gitaba man·aha aro da·o West Garo Hills a·jao ia COVID-oni nampilgiparang gimik sak 4822 gapengaha.
