SHILLONG: Adita salrangna skang, Haryana a·dokni Gurugram-o A·chik sakgnini siani a·selko am·sandina gita Haryana sorkari, Special Investigation Team (SIT)-na pakwate on·angaha ine kobor on·aha.
Ia a·selni bidingo dingtang dingtang dolrang aro dilgiparang, sorkarina u·iatani ja·man Prime Minister’s Office (PMO)-oni ge·etaniko man·ahani gimin ia a·selni bidingo am·sandina gita Haryana sorkari SIT-na pakwate on·angaha ine kobor on·aha.
Koborko on·ani gitade, Rose Sangma aro Samuel Sangma manisa Assam a·dokni Karbi Anglong-o songdongkamgipa A·chikrang ong·achim indiba uamang da·o Nagaland a·dokona apjitangskae, uano dongengachim.
Re·anggipa jao Rose Sangma saahani gimin uko Samuel, Delhi-ni private hospital-ona rimangahachim indiba ja·mano ua saa bilongbatna a·bachengahani gimin June 24 tariko uko Gurugram-ni Sector 10-o donggipa Alfaa Hospital-ona ra·angskaahachim. Hospital-o sannaniko man·e Rose an·sengbapilengahachim indiba ua hospital-o doctor aro nurse-rangni mikkangon ice cream cha·ani ja·man rang·gitik saa bilongbataie siangna gita nangaha.
Iani bidingo sianggipa Rose Sangma-ni gritang Samuel Sangma, sagipa mandena ice cream on·ani gimin doctor aro nurse-rangko sing·doon, doctor-rangoni saksa uko kragija dake dokaha aro salgipino ong·na kragija dake uni manggisikoba uni dongchakenggipa hotel kuturionikosa dingdee dongako man·aiahachim.
Ia a·selni bidingo Meghalaya aro Nagaland a·dokrango dingtang dingtang dolrang, jegale inquiry-ko dakchina aro dos donggipa manderangni kosako rakgipa ja·kurangko de·china dabitokaha aro dilgiparangoniba, Chief Minister Conrad K Sangma, a·dokni Governor Satya Pal Malik, Tura-ni MP Agatha K Sangma aro Opposition Congress dolni dilgipa Mukul Sangma, ma·mong sorkarini dilgiparangna sedoatahachim.
