TURA: Tura-ni North Eastern Hill University (NEHU) campus-o nangchongmotgipa subject-rang dongkujaengani a·sel aro ia university-o nanga gita chatro chatrirangna biaprangko on·na man·jaengani a·sel, chubata gadangrango poraidapna nangenggipa Garo Hills-ni chatro chatrirang neng·nikanirangko chagrongna nangtokenga ine Garo Graduates Union (GGU) parakatenba, Tura-o central university damsako kulichina gita Tura-ni MP Agatha K Sangma-na sedoataha.
Tura-ni MP-na sedoatgipa chittio GGU-ni parakatani gitade, Tura-o aro Garo Hills gimikon graduate level aro post graduate level college-rang chu·onga gita dongjani a·sel Garo Hills gimikni chatro chatrirangna biaprang chu·ongjaenga aro uandaken central university baksana college-rangko nangdapkuengachim.
Tura-o donggipa College of Teachers Education (CTE) aro Community Science College-ni gimin janapatskaengon, NCTE-ni dongimin niamrango pangchake CTE-o skigiparangko chu·onga gita ra·china aro kamna kragipa principal-ko songe on·china GGU didiatenba, Community Science College-oba poraiani course-rangko baridapatan baksana chatrirangko bang·bate ra·china didiataha.
Garo Hills gimiko damsamangmang dongpagipa ICSE skulni gimin janapatskaengon, Tura Public School-ko kulichengaoni da·o bilsi 39 batangpilengahaoba da·o ia skulo full fledged ba chu·gimik bil gnanggipa principal dongjaenga ine GGU suk ong·gijaniko parakatenba, ia skulna ta·raken full fledged principal-ko on·china sorkariko didiataha. Tura Public School-o higher secondary section, science laboratory aro uandakgipa nangchongmotgipa cholrangko on·chinaba GGU didiataha.
GGU-ni parakatani gitade, sorkarini dongimin niamo pangchake a·ja ge·antion Jawahar Navodaya Vidyalaya (JNV) dongna gita nangachim indiba West Garo Hills a·jaode da·onan JNV dongkujaengani gimin West Garo Hills a·jaoba JNV-ko kulie on·china gita Tura-ni MP-ko didiataha.
Indake ong·engon, Tura-o donggipa RVTI, Polytechnic Institute, Garo Hills-ni post office-rang, Tura-ni Passport office, MSME office, Doordarshan Kendra aro uandakgipa dingtang dingtang kamrangkoba niatchina gita GGU, Tura-ni Lok Sabha MP Agatha K Sangma-ko didiataha.
