TURA: South West Garo Hills a·jani dingtang dingtang biaprango salantian COVID-19-ko man·giparang batroroengkuani gimin South West Garo Hills a·ja gimikon re·baenggipa July 19 tarikni pring 5:00 bajiona kingking chu·gimik lockdown-ko ra·gatangtaiaha ine South West Garo Hills a·jani District Magistrate u·iataha.
Lockdown-ni somoio nangchongmotgipa dokkanrang aro sam dokkanrangna agrede gipin dokkanrangko kulina man·jawa aro gari gorarangba nangchongmotgipa bosturangko salruraenggipa garirang, sanna banani kamrangko ka·enggiparang aro gipin nangchongmotgipa kamrangko ka·enggiparangna agrede re·rurana man·jawa.
Deputy Commissioner-ni u·iatani gitade, nangchongmotgipa dokkanrangko Sombar saloni Sukrobar salona pring 8:00 bajioni attamni 2:00 bajiona kulina man·gen aro gipin dokkanrangkoba Sombar, Budbar aro Sukrobar salrangode pring 8:00 bajioni attamni 2:00 bajiona kulina man·gen.
Garirangkoba odd/even nomboro pangchake re·rurana gita district administration, niamko donataha aro uandaken Sombar, Budbar aro Sukrobar salrango 2,4,6,8 aro 0 nomborchi bon·gipa garirang re·rurana man·gen aro Mongolbar, Bristibar salrangode 1,3,5,7 aro 9 nomborchi bon·egipa garirang re·ruraskana man·gen.
Mande sianirangode district administration-oniko permission ra·chengenba sak 10-na bate manderang tom·chimongna man·jawa indiba da·o dipet bia ka·anirangkode ong·atna on·kujawa ine South West Garo Hills a·jani District Magistrate u·iataha.
Lockdown-ni somoio bostu salruragipa garirang, medical, police, civil defence & home guards, fire & emergency service, MeECL, PHE, agriculture aro veterinary, municipal, PWD, NHAI, FCI, petrol, diesel, LPG, press aro uandakgipa nangchongmotgipa manderangni re·ruraanikode champengani dongjawa ineba u·iataha.
