TURA: Garo Hills Autonomous District Council (GHADC)-o professional licence aro Trading for Non-Tribals (TNT) licence-na dorgasto galenggiparangna damrangko bariatahani gimin talataniko on·china Tura-ni MDC aro BJP dolni ku·wattimgipa Bernard N Marak, Taxation-ni Executive Membor (EM) Grahambell Sangma-ko didiangaha.
Tura-ni BJP MDC Bernard Marak-ni parakatani gitade, Professional certificate aro TNT licence-ni damrangko GHADC-ni gitcham Executive Committee (EC) bariatahachim indiba ia damrangko a·dokni Governor ra·chakkujaengachim.
“Ian jadokna choligipa ordinance gitasan ong·aiachim indiba Professional certificate aro TNT licence-rangni rate-ko mitamkode changgittam batpile bariataha,” ine Marak parakatenba, ia ra·chakkugijagipa rate ba damrangko niam gri bariataha ine matnangataha.
Indake ong·engon, iandake Professional certificate aro TNT licence-ni damrangko Meghalaya Governor ra·chakchenggija bariataniara niamni a·palo ong·enga ine Tura-ni MDC parakatenba, Executive Membor-ni talataniko on·kujaskal, kajinarangko gamkujachina Garo Hills-o bading chiwalgiparangko didiataha.
