SHILLONG: Adita salrangna skang, East Jaintia Hills a·jani Khliehriat police reserve-ko boma gopretanio jak donga ine Hynniewtrep National Liberation Council (HNLC) bobil dol a·kangatani ja·man, a·dok sorkari HNLC bobil dol baksa tom·tomanina agangrikani bidingo ma·mong sorkari baksa agangrikenga ine Sukrobar salo a·dokni Chief Minister Conrad K Sangma parakataha.
“HNLC dolko tom·tomaona rimbapilna gita agangrikani bidingo chinga ma·mong sorkari baksa agangrikchengenga indiba agangrikaniko dakna gitade uamang (HNLC), so·sojengjeng ong·atani kamrangko watgale tom·tomaniko rakkichengna nanggen,” ine Chief Minister Conrad Sangma parakataha.
Meghalaya a·doko bobil dake chakatgipa dolrang ong·katbataengahama ine sing·on, a·doko so·sojengjeng ong·atani kamrangko chel·chakna aro tom·tomaniko rakkina gita Meghalaya a·dokni police-rang raken kamko ka·enga ine Chief Minister parakatskaaha.
East Jaintia Hills a·jani Khliehriat-o donggipa police reserve-ko boma godapahani giminba Chief Minister an·tangni suk ong·gijaniko parakataha indiba mikkangchi iandakgipa kamrangko chel·chakna police-rang rake kamko ka·anggen ine parakataha.
Re·anggipa Budbar pringwalo, Khliehriat police reserve building-o IED bomako gopretahachim aro ia boma gopretanio HNLC bobil dol jak donga ine a·kangatahachim.
Ia boma gopretanio darangba mata bu·anirangkode man·jahachim indiba police reserve building-ni boundary wall nosto ka·ako man·skaahachim.
