TURA: South West Garo Hills a·jani Mahendraganj-o rikna manchienggipa Maternity & Child Hospital (MCH)-ko a·jani headquarter Ampati-on rikchina gita A·chik Holistic Awakening Movement (AHAM) South West Zone Ampati dabiangaha.
AHAM South West Zone-ni general secretary Wester G Sangma-ni parakatani gitade, ia hospital-ko rikna gita 2017 bilsini November 27 tariko a·dokni gitcham chief minister Mukul Sangma-ni foundation stone-ko songe on·angaonin South West Garo Hills a·jao songdongenggipa manderangoni bang·batan ia hospital-ko Ampati-o rikchina dabitokengachim aro iani bidingo AHAM dolni dilgiparangba, re·anggipa 2020 bilsini October 21 tariko sak 27 a·king nokmarangni soiko ra·enba complaint letter-rangko sorkarina on·atmanahachim. Uni ja·man ia 2021 bilsini April 1 tarikoba AHAM-ni dilgiparang, a·dokni chief minister Conrad K Sangma-ko gronge, ia MCH-ko Ampati-on civil hospital-ni sambao rikchina didiangahachim.
“Ia MCH-ko international border aro chi banronggipa Mahendraganj-o rikgenchimode South West Garo Hills a·jani bang·a manderangan neng·nikanirangko chagrongna nanggen ine nikesa chinga ia hospital-ko Ampati-o rikchina dabiengachim indiba chingni mol·molanirangko gitcham aro gital sorkariba knachakna gisiko nangjaenga,” ine AHAM-ni general secretary parakatenba, ia hospital-ko Ampati-on rikchina gita sorkariko didiangtaiaha.