SHILLONG: Sombar salo Meghalaya Cabinet-ni tom·anio Youth Policy 2021-ko ra·chakangan baksana gipin nangchongmotgipa kamrangni giminba chanchirime nangchongmotgipa kamrangko ra·chakna gita tik ka·angaha.
Cabinet-ni tom·anio a·doko donggipa public skulrang aro pine mount school-ni giminba chanchiange ia skulrangko Directorate of School Education & Literacy (DSEL)-ni ning·o donatna gita ra·chakangaha.
Da·o dipet Meghalaya a·doko public skulrang aro Shillong-ni Pine Mount School-de DSEL-ni ning·o ga·akkujaengachim ine nikna man·a.
Indake ong·engon, Meghalaya a·doko skulni pilak kamrangkon apsan bewalo aro nambate ka·na man·na gita public skulrangko aro Pine Mount School-koba DSEL-ni ning·o donatna gita sorkari manchiangaha.
Mawmluh Cherra Cement Limited (MCCL)-ko nangrime chalaina gita bi·anikoba Cabinet-ni tom·anio ra·chakangjolaha ine kobor on·aha. Batanggimin bilsirango MCCL-ko chalaianio tangka paisani gita neng·nikanirangko chagrongna nangengani gimin MCCL-ko tangatpiltaina gita Industries department, Cabinet-ona ra·angaha aro MCCL-ko tangatpiltaina gita gong kror 190 tangkarangko a·dok gamna man·jawa ine nikenba, ia MCCL-ko nangrime chalaina proposal-ko ra·angon, ia proposal ba bi·aniko Cabinet, Sombar salo ra·chakaha.
Ia apsan somoion a·dokni Cabinet, Meghalaya Public Private Partnership (PPP) Policy 2021-koba ra·chakangjolaha.
Da·o dipet India a·songo PPP policy dongkugijagipa damgittam a·dokrangoni Meghalaya a·dokba damsa ong·kuengachim ine nikna man·a. Indake ong·engon, Meghalaya a·dokoba private company-rangna sorkarini kamrango invest ka·ani cholrangko on·na gita ia PPP policy-ko Cabinet ra·chakangaha ine u·iataha.
PPP policy-rangara bang·bata changon dal·dalgipa project-rangsa ong·ani gimin a·dok sorkari, Community Public Private Partnership (CPPP) policy-ko ra·gatskaaha aro ia CPPP policy-ni ning·o badiaba song ba gittimrang, tourism, agriculture, horticulture, veterinary ba uandakgipa kamrangna private company-rangni on·gilaniko nangnikenga ong·ode ia policy-ni ning·o iandakgipa project-rangko ra·na man·gen ine official-rang parakataha.
Indake ong·engon, Jail Road-ni Shillong Municipal Board-ni a·ao 5 Star Hotel-ko namdapatna gita a·dokni Cabinet, Maxim Infrastructure & Real Estate Pvt Ltd baksa bilsi 30-na gital dake songgigriknaba ia tom·anio tik ka·angjolaha.
Meghalaya Forest Regulations 1973 Act-ni gimin chanchiangengon, ia niamko tarichengaonin taridapa dongkujaengani gimin Cabinet-ni tom·anio ia niamkoba taridapna gita ra·chakangaha.
