SHILLONG: Union Home Minister Amit Shah, mni Sukrobar salo Meghalaya Chief Minister Shri, Conrad K. Sangma, Union DoNER Minister G. Kishan Reddy, MoS Science & Technology Dr Jitendra Singh, MoS DoNER B.L. Verma, Deputy Chief Minister Prestone Tynsong, Transport Minister Sniawbhalang Dhar aro gipin chugipa gadangni official-rangni dongpaanichi Shillong, Mawiong-o donggipa Inter-State Bus Terminus (ISBT)-ko nokdonggae on·angaha.
A·dokni mongsonggipa ISBT-ko ma·mong sorkarini Ministry of DoNER-ni gita kror 48.31 tangka-paisarangko on·e dakchakanirangko on·anichisa matchote rikna gita man·aha ineba koborna parakataha.
Mawiong ISBT-ko oprakani somoio, Union Home Minister Amit Shah, jinmana parakatengon, “Ia kamba Prime Minister Narendra Modi-ni salgro-salaram jolo donggipa a·dokrangni mongsonggipa skotong songjinma-rangona mikkang 2024 bilsi dipetde, rel gari, sildoreng aro bus garirang re·rurana man·a gita mongsonggipa rama-jal·angrangko sokatna miksonge kamko ka·gipaoni mingsa ong·chongmota,” ine parakataha.
Meghalaya a·doko, ISBT-ko kuliani mongsonggipa miksonganiara, an·chingni aro Prime Minister-ni miksonganiko a·bachengatani bakba ong·taia, ineba ua agandapaha.
Indake ong·engon, Shillongo ISBT-ko rikani aro uko challaianichi, a·dokni economic-ko, tang·doatan baksa songre-songbatgipa manderangna namgniko ra·baan baksa, bostu salenggipa gari-gurarangna namgni ong·gnok, ineba ua parakataha.
“Shillong, a·dokni skotong songjinma ong·e sagro-salaram jolo donggipa a·dokrang baksa nangchapgrikgipa ong·a. Uan Assam a·dokoniko bak dakgijagipa ong·a. Maina uan salgro-salaram jolo donggipa dam sni a·dokrang baksa ekna galna man·gijagipa a·dok damsaba ong·taia,” ineba ua parakataha.
Uarangna agreba, Chief Minister, Conrad K. Sangma, Union Minister-ko a·dokona re·baani gimin mittelatengon, “Ma·mong sorkari, salgro-salaram jolo donggipa a·dokrango namdap-sildapani dongjaengani bidingo namen rake kamko ka·enga. Una agreba, Union Home Minister-ni parliament session somoio salgro-salaram jolo donggipa a·dokrangni gimin ma·mong sorkari baksa kamko ka·na mikpakma nianiara, uan ma·mong sorkarini gita jolo donggipa a·dokrangni economic-ni gita tang·doanina kamko ka·na miksongani gnang ine mesoka,” ineba Chief Minister Conrad K. Sangma parakataha.
