SHILLONG: Champengako man·gipa United Liberation Front of Assam-Independent (ULFA-I)-ni saksa dal·batgipa dilgipa ong·e maikae silchidare gri an·tangko bame on·ena man·pila ine Opposition dilgipa Mukul Sangma sing·doangaha.
“Silchidare gri ua maikae ong·katbana man·a. Uni silchidarerangara bano, uako maina a·dok police-ara uo sing·ja,” Mukul Sangma koborni manderangna aganaha, jean unaskango Garo Hills-o bobil dolrang chakatna am·taienga ine aganahachim.
“Ua an·tangni silchidarerangko uchin galbaijokma.. ian match fixing ba baji ka·ama. Uamang manderangni janggirangko kal·ake rona nangja, jeon bang·a janggirangan uamangni jako so·otako man·aha,” Opposition dilgipa aganaha.
Uni agangimin gita, Garo Hills-o bobil dolrang chakattaina am·enga ingipako agantaiengon, ia kamrang skang 2019 bilsionin a·bachengengjok ine aganan baksa, 2018 bilsio Mukul Sangma Sorkari bilona sokbataigen inenba GNLA-ni ka·namgijagipa dilgipa Sohan Shira-ba, bame on·kujachina manderangchi didiatako man·ahachim, Pa Sangma agandapaha.
Unaskango, Garo Hills-o bobil dakgipa dolrang chadengtaina ba nakattaina am·engjok ine Opposition dilgipa Dr Mukul Sangma re·anggipa Robibaro mangmangsan aganahachim aroba iani bidingo sorkariko niatchina gitaba Dr Sangma, Sorkariko aganahachim aro bobil dakgiparang dol dakengaha aro silchi-darerangko skatang ra·e roramenga ineba ua aganahachim.
Indake ong·engon State Security commission-ko tom·ate chanchidilchina gitaba Pa Sangma, Sorkariko aganaha.
