TURA: South Garo Hills a·jani Baghmara-o rikenggipa FCI godown-ko bilsi 10-na skangan rikna a·bachengahaoba da·onan matchotkujaenga ine South Garo Hills a·jani NGO-rang parakatenba, iani bidingo South Garo Hills a·jani Deputy Commissioner-na badi ka·doangaha.
NGO-rangni parakatani gitade, ia FCI godown-ko Hindustan Prefab Limited company, Ampangdam Baghmara-o rikengachim aro ia godown-ko bilsi 10-na skangan rikna a·bachengahaoba da·alonan be·en pil·chipkujaengachim.
“Ia FCI godown-ko matchotjaengani gimin uamang dingtang dingtang a·selrangko pa·sike aganenga indiba bilsi 10 batpilonaba godown ge·sako matchotgijaniara namen kragijani ong·a. Chingni kobor man·soani gitade ia FCI godown-ko rikna gita uamang sub-contract-koba on·skaaha,” ine GSU Southern Zone-ni president Chuang Sangma parakatenba, ia FCI godown-ko ta·raken matchotatna man·na gita kamrangko niatchina Deputy Commissioner-ko didiataha.
Indake ong·engon, Baghmara civil hospital-o doctor-rang aro gipin kam ka·giparang chu·ongjaengani gimin bangbang ong·e dongenggipa kamrango ta·raken gapate on·china gitaba jolni NGO-rang, South Garo Hills a·jani Deputy Commissioner-na sedoataha ine u·iataha.
NGO-rangni parakatani gitade, Baghmara civil hospital-na nangkuenggipa kamrangara, medical & health officer-na sak 3-oni sak 5, senior medical & health officer (grade II)-na sak 2 ba sak 3, SM& HO (grade I)-na sak 1 ba sak 2, ambulance driver-na sak 2, handyman-na sak 2 aro mortuary van driver-na sak 1 ong·engachim.
Baghmara civil hospital-ni COVID ward-ko ta·raken namdapatchina gitaba NGO-rang dabiangaha aro ia dabianirangko chu·sokate on·jagenchimode jingjengataniko dakana agre gipin cholrang dongjawaha ineba GSY Southern Zone-ni president parakataha.
