TURA: Garo Hills Autonomous District Council (GHADC)-o Executive Committee-ni kosako kamrangko ka·ahani gimin Non Gazetted Employees Association (NGEA)-ni mitam dilgiparangko dikdiksana kam ra·galatenba, president-ni kamkode chu·gimik bon·atsrangaha ine kobor on·aha.
GHADC-o kam ka·enggiparangna dormaharangko on·kujaengani gimin batanggimin somoirango NGEA-ni gita kamrangko ka·gija jingjengatahaon, NGEA-ni dilgiparangna Executive Committee, show cause notice-rangko on·ahachim aro uandaken NGEA-ko dilgiparangni aganchakanirangko nipilna gita Sukrobar salo, GHADC-ni Chief Executive Membor (CEM) Benedic R Marak-ni dilanichi EC-ni tom·aniko ong·atangahachim.
NGEA-ko dilgiparangni aganchakanio chu·ongnikanirangko man·jahani gimin aro EC-ni kosako chakatpilna jotton ka·ahani gimin ja·mano NGEA-ni mitam dilgiparangko ‘suspend’ ka·enba president-ni kamkode chu·gimik bon·atsrangaha ine kobor on·aha.
“Uamangni aganchakanirangko EC chu·ongnikjaha maina uamang EC-na talate on·ani pal EC-ni kosakosa chakatpangpilaha,” ine GHADC-ni Executive Committee parakataha.
NGEA-ni president Johny Senora Arengh, jean GHADC-ni Taxation department-o LDA-ni kamko ka·engachim, uni kamko Executive Committee, chu·gimik bon·atsrangaha aro NGEA-ni gipin dilgiparang, chong·motan NGEA-ni secretary Brithen M Sangma, joint secretary Flaming B Marak, adviser Balseng M Sangma, sakgipin adviser Augustbell R Marak aro gipinrangko suspend ka·skaaha ine kobor on·aha.
“Jagnina skangan dolgnini gisepo songgigrikmanahachim indiba uamang ia songgigrikaniko ja·rikna jechakahani gimin EC, ia ja·kuko de·na nangao ga·akaha. GHADC-o kam ka·giparangni dormaharangko on·na gita tangkarangko chimongna uamang jagni somoiko EC-na on·gen ine dolgnini gisepo songgigrikahachim. Indake ong·genchimoba ua somoio GHADC-ni CEM aro Chairman sakgnian COVID-19 man·e noktangtango nape dongna nangao ga·akaha aro ua somoio NGEA-ni dilgiparang, Council office-on tom·e jingjengatanirangko dakna manchitaiaha. Uamangni iandake jingjengatna manchitaianiara dolgnini gisepo songgigrikaniko pe·ani gita ong·aha,” ine GHADC-ni official-rang parakataha.
Indake ong·engon, dilgiparangni kamko bon·atahani gimin NGEA-ba kachariona re·ange EC-ni kosako dakgrikna manchiskaaha ine kobor on·aha.
