TURA: COVID-19-ni giproroaniko champengna gita lockdown-rangko ra·gatengkuani gimin ia bilsioba a·songni Independence Day ba jakgitelani salko Tura-o chone manianggen ine sorkari official-rang u·iataha.
Jakgitelani salko pangna bilsi manichakrongenggipa PA Sangma Stadium-ko Multipurpose Integrated Stadium dakna gita da·o kamrangko ka·engahani gimin ia chango a·songni jakgitelani salko Tura-o, New Tura-o donggipa Law College kal·chakramo maniangskagen ineba u·iataha.
Ia bilsio a·songni jakgitelani salko pangna manirongbaenga gita ong·gija chonbate maniskana manchisoengoba, West Garo Hills a·jani dingtang dingtang biaprango bol charangko ge·e, office-rango kam ka·gipa mitam manderangna mande ra·pilskaanirangko dake aro adita salrangna skang parakatgipa SSLC aro HSSLC porikkarango teng·sugipa chatro chatrirangna mande ra·pilskaaniko dake manina district administration tik ka·soenga ineba koborko on·aha.
Ia bilsini Independence Day-ko maniani bak gita dingtangmancha salgniskangan dingtang dingtang gittimrango, office-rango aro Tura-ni samba jolrango rongtal an·talatanirangkoba dakna manchisoaha.
