TURA: West Garo Hills a·jani a·kawe jolo skulni managing committee-ko ra·galenba, adhoc committee-ko songskaahani gimin ia managing committee-ni membor-rang, District School Education Officer (DSEO)-ni kosako jegale Shillong-o donggipa School Education & Literacy-ni Director-na sedoataha.
Iani bidingo School Education & Literacy-ni Director-na sedoatengon, skulni managing committee-ko ra·gale adhoc committee-ko songskaahani gimin Namabila Higher Secondary School managing committee-ni membor-rang, DSEO-ni kamko sing·doangenba, ia adhoc committee-ko den·galpilchina dabiangtokaha.
Ra·galako man·gipa managing committee membor-rangni parakatani gitade, DSEO-ni songe on·gipa adhoc committee-o tangka paisarangko jakkalsretanina ra·galako man·gipa gitcham secretary Golam Hassan-koba songpiltaiahachim.
“Chingni committee-ko 2018 bilsion songe Education department ra·chakmanahachim. Ia committee, 2021 bilsini November jaosa bon·ani ong·engachim indiba DSEO chingko ra·galenba adhoc committee-ko songe on·skaaha aro ia adhoc committee-o tangka paisa jakkalsretanina ra·galako man·gipa gitcham secretary Golam Hassan aro Shakmal SSA skul minggipa gipin skulni skigipa Samiul Islam-kosa president songskaaha,” ine ra·galako man·gipa managing committee-ni membor-rang parakataha.
Ia skul managing committee-ko songpiltaichina aro DSEO-ni kosako rakgipa ja·kurangko de·china gitaba committee-ni membor-rang, School Education & Literacy-ni Director-ko didiangaha.
Indake ong·engon, iani bidingo ra·galako man·gipa Namabila skul managing committee-ni president Jamial Hoque, West Garo Hills a·jani DSEO-naba dingtang sedoataha aro ia skul committee-ko ra·galani bidingo talataniko on·china dabiangaha.
“Committee-ko ra·galani bidingo maini gimin talataniko on·chengjaha aro maiba ong·gija dakanirang donggenchimode maini gimin inquiry-ko dakatjaha?” ine skulni president sing·doangaha.
An·tangni bilko ong·gija dake jakkalenba DSEO, ia skulni managing committee-ko ra·galaha ineba committee-ni president matnangataha.
WGH-o skul com.-ko ra·gale adhoc com.-ko songskaanina DSEO-ni kosako jegala
Date:
Share post:
