SHILLONG: Mongolbar salo Shillong songjinmani Laitumkhrah-o IED boma gopretanichi mande sakgni saknaanirangko man·na nangahani gimin a·dokni Chief Minister Conrad K Sangma, suk ong·gijaniko parakatenba, boma gopretanio jak donggipa manderangko bakan rim·na man·gen ine parakataha.
Laitumkhrah-o boma gopretanina an·tangni suk ong·gijaniko parakatengon, batanggimin somoirangoba a·dokni dingtang dingtang biaprango iandake boma gopretanio jak donggipa manderangko police-rang rim·na man·aha aro apsan daken Laitumkhrah-o boma gopretgipa manderangkoba police-rang bakan rim·gen ine Chief Minister parakataha.
“Shillong songjinmani Laitumkhrah-o boma gopretaniko Cabinet raken jegalenga aro ia bomako gopretanio jak donggipa manderangni kosako rakgipa ja·kurangko de·china police-rangko ge·etaha,” ine Chief Minister, Mongolbar salo kobor ra·timgiparangna parakataha.
Chief Minister-ni parakatani gitade, re·anggipa July jao East Jaintia Hills a·jani Khliehriat-o IED boma gopretgipa manderangkoba police-rang rim·na man·tokaha aro Mongolbar salo boma gopretgipa manderangkoba police-rang bakan rim·gen.
Laitumkhrah-o boma gopretaniko Hynniewtrep National Liberation Council (HNLC) bobil dol a·kangatahachim ine nikna man·a.
Unomitingo, Laitumkhrah-o IED boma gopretataniko Home Minister Lahkmen Rymbui-ba bilaken matnangataha.
Boma gopretani a·selko Laitumkhrah Dorbar matnangata:
Mijal salni bako East Khasi Hills Shillong-ni Iew Laitumkhrah-o IED boma gopretataniko Laitumkhrah Dorbar Shnong Pyllun, bilaken matnangataha, indake ia sabisi sajinmachi manderangni neng·nikatako man·engmiting somoio aroba Shillong songjinmao manderangni tom·tom ong·e janggi tangenganiko boma gopretate jajrengani ra·bagipa manderangko rim·e sasti on·china gitaba Dorbar Shnong G. M. Bruce Sawkmie law enforcement agency-rangko didiataha, jedakode manderangni ka·dongna man·ani sokbapilgen.
