SHILLONG: Meghalaya a·dokoba COVID-19 giproroengkuani gimin Shillong-ona re·anggija man·a dipet biaptangtango donggipa skul aro college-rangon admission-ko ra·china gita a·dokni Education Minister Lahkmen Rymbui, porikkao pass ka·gipa chatro chatrirangko didiataha.
Iani bidingo kobor ra·timgiparangna talatangengon, Meghalaya a·dokni bang·bata biaprangon gital skulrangko kulidapahani gimin da·o gita sajinmani somoirango chatro chatrirang, Shillong songjinmani skul aro college-rangosan admission-ko ra·na jotton ka·aigija biaptangtangon admission-ko ra·e poraina nanga ine Education Minister parakataha.
Ia bilsini SSLC porikkao sak 34,000-mangni gita chatro chatrirang chu·sokgipa ong·ahachim aro iana agreba CBSE aro ICSE-o pass ka·gipa chatro chatrirangba da·o dingtang dingtang skul aro college-rango admission-ko ra·na jotton ka·tokengahachim.
Indake ong·engon, ia bilsini porikkarango pass ka·gipa chatro chatrirangna a·dokni dingtang dingtang biaprango chu·onga gitan biaprang donga ineba Education Minister parakataha.
Skul aro college-rangko kulipiltaiani gimin sing·on, skul aro college-rangko kulipiltaina gita Education department cholrangko nienga aro department-ni gita COVID review committee-na report-ko on·angani ja·mansa skul aro college-rangko kulipiltaiani bidingo chanchianggen ine Rymbui parakataha.
“Anga an·tangba classroom-rango skie on·aniko ta·raken a·bachengatpiltaina nangnikenga,” ine ua aganaha.
