SHILLONG: Meghalaya a·doko bobil dake chakatenggipa Hynniewtrep National Liberation Council (HNLC) dolni gitcham general secretary Cheristerfield Thangkhiew, Sukrobar pringwalo police-rangni gochakanio guli nangako man·e siangna gita nangaha.
Koborko on·ani gitade, adita salrangna skang Shillong songjinmani Laitumkhrah-o IED bomako gopretanio jak dongani gimin police-rang Mawlai Kynton Massar-o donggipa Cheristerfield-ni nokko chadrapeon, ua churichi police-rangko chadrappangpilna jotton ka·aha aro uandaken police-rang, Sukrobar pringwalni 2:45 bajimango silchidarerangchi uko gochakaha. Guli nangahani gimin bakan police-rang, Cheristerfield Thangkhiew-ko Shillong civil hospital-ona ra·angahachim indiba hospital-ona sokangon uko siaha ine doctor-rang parakataha.
So·otako man·gipa Cheristerfield Thangkhiew-ni nokoniko police-rang, 9 mm pistol, churi, laptop aro adita mobile phone-rangko man·aha ineba kobor on·timgiparang u·iataha.
Koborko on·ani gitade, unbaksa kam ka·rimgipa mande sakgnikoba police-rang rim·aha.
Sianggipa HNLC-ni gitcham general secretary, 2018 bilsio a·dokni Deputy Chief Minister Prestone Tynsong, a·dokni gitcham DGP RP Agarwal aro gipin dilgiparangni mikkango Police headquarters-o bame on·eahachim.
1987 bilsio ua Hynniewtrep Achik Liberation Council (HALC) bobil dolko bikotdilchenggipa membor-rangoni saksa ong·achim aro 1997 bilsio HALC dolko HNLC ine mingsreskaani ja·man ua general secretary-ni kamko jako ra·skaahachim.
Indake ong·engon, so·otako man·gipa HNLC-ni gitcham general secretary da·o HNLC bobil dolni kamrango maming bak dongpajachim ine HNLC dol a·kangatskaenba, uko so·ote galani gimin a·dokni Home Minister Lahkmen Rymbui aro HNLC doloni bame on·gipa mande sakgniko a·jak sokskana gita ka·mikkenataniko on·angaha.
HNLC bobil dolni general secretary aro publicity secretary Sainkupar Nongtraw-ni parakatani gitade, HNLC bobil dol baksa agangrikna Thangkhiew-ko Intelligence Bureau (IB) aro Special Branch (SB), ku·baltigipa gitasa jakkalengachim.
“Chingni IB aro SB-na seatgipa chittiko Thangkhiew gitasa on·atahachim,” ine Nongtraw parakataha.
HNLC-ni parakatani gitade, skangonin HNLC-oni an·tangko bame on·gipa Herman Pakyntein, Cheristerfield Thangkhiew-na ka·mikkenatanirangko on·engachim aro police-rang baksa nangrime uko so·ote galna miksonganirang dongachim.
Sianggipa Cheristerfield Thangkhiew-ni nokdangnaba HNLC dol, kalimpaaniko parakataha.
