SHILLONG: Hynniewtrep National Liberation Council (HNLC) bobil dolni gitcham general secretary Cheristerfield Thangkhiew-ko police-rangni so·otgalani bidingo judicial inquiry-ko dakna gita Meghalaya sorkari, Meghalaya Human Rights Commission (MHRC)-ni chairman Justice T Vaiphei-ko inquiry committee-ni chairman songaha.
Meghalaya a·dokni Chief Minister Conrad K Sangma-ni parakatani gitade, ia judicial inquiry-ko dilna gita seokako man·gipa official-ara Human Rights Commission-ni chairman ong·e inquiry-ko dilanio, mandena on·gimin bilrangkoba nigen aro ia judicial inquiry-ko kakket bewalo chu·sokatna kamko ka·anggen.
HNLC-ni gitcham dilgipako police-rangni so·ote galaniko sorkari judicial inquiry dakchina ge·etengon, Mawlai jolo songdongenggipa manderangde ia judicial inquiry-ko jegale, National Human Rights Commission (MHRC)-na pakwate on·skachina dabitokengachim ine nikna man·a.
Mawlai jolo songdongenggipa manderang judicial inquiry-o ka·dongchakna man·jaengahani gimin NHRC-na pakwate on·china dabitokskaengachim.
