NONGSTOIN: West Khasi Hills-ni Nongstoin-o mnisal waljatchio mechik sakgni Phlesis Syiem (79) aro uni noko cha·parikgipa Tiehsaw-ni Maitlynti Lyngdoh Marshillong (25) mangko so· otaha.
Noksulrangni aganani gitade, walni 11 bajimango ma·sina man·gijagipa mande covid protocol-ko chol ra·enba mask gane so·ot man·gipa mandeni nokona re·angaha, jekon darangan ma·sirikna man·jahachim.
Koboro gitade, pilak ong·anirangko nigrikaton, nokona re·bagipa mandeko nok nokgipa ma·sina nanga, maina ua getko osoaha, namen agangrika aro uni nokona rimchaksoaha, unigimin indakgipa a·selrang ong·gen ine darangoba maming chanchipani dongjaha.
Koborogita, a·sel ong·ani ja·mano, noko darangba dongja ine chanchichina gita dosi dakgipa mande tala chabirangko ra·enba nokni do·ga aro get-ko a·palchini teke donangahachim.
Mijal pring 10 bajimango so·ota man·gipa me·chikni depante nokona re·baon, a·palni get aro do·gako chabi tekako nikeaha aro Shillongchi dedrangko grona re·angakon ine chanchichipahachim, indiba ja·mano maidakgipa chanchiani nabaenba do·gako kulidrakenba ma·gipako aro noko cha·parikgipako okamon darangba ku·chakjani gimin kutturi ge·antiona nape sandion ma·gipa aro noko cha·parikgipa me·chikni an·chichripchrip a·ao ga·ake dongako nikahachim.
So·otani parirangko nikon chakku, rot aro gipin silchidarerangchi ka·saninggija so·otaha ine ma·sina man·ahachim.
A·sel ong·gipa biapona West Khasi Hills-ni Superintendent of Police, H.G.Lyngdoh, IPS an·tangan DSP HQ aro Nongstoin PS baksa a·sel ong·anirangko nieaha aro Nongstoin PS-o mamla segataha ineba Lyngdoh aganaha.
