TURA: Dingtang dingtang dolrangni dabienggipa entry/exit point ba facilitation centre-ko Budbar salo, Meghalaya a·dokni Chief Minister Conrad K Sangma, Assembly-ni Deputy Speaker Timothy D Shira baksa, North Garo Hills a·jani Mendipathar Railway Station-o kulie on·angaha.
Meghalaya a·dokni skanggipa entry/exit point (facilitation centre)-ko re·anggipa 2020 bilsini December 21 tariko Ri Bhoi a·jani Umling-o kuliahachim aro da·o ia apsan dakgipa facilitation centre-ko Mendipathar Railway Station-oba kuliahani gimin ian a·doko gnigipa centre ong·aha.
Mendipathar Railway Station-o ia facilitation centre-ko kulie on·angani somoio a·dokni Chief Minister, jinmana aganprakengon, ia biapo facilitation centre-ko kuliahani gimin ian da·o a·paloni re·baenggipa manderangko nambate nirokna dakchakani ong·gnok ine parakangaha.
“Ia facilitation centre-an gipin biaprangoni Garo Hills-ona re·baenggipa manderangko nirok sandianio district administration-naba dakchakani gita ong·gnok,” ine Sangma aganaha.
Mendipathar-o railway station-ko kuliahani gimin mittelpile aganangengon, ian jolo songdongenggipa manderangna bang·a namgniko on·enga maina ia railway station gita manderang songre-songrebatasan ong·aigija game ge·e cha·giparangba da·o an·tangtangni game ge·e man·gipa bosturangko gipin biaprangona ra·ange palna sim·na man·engaha ine Chief Minister parakataha.
Meghalaya a·doko dal·batsranggipa food park-ko Mendipathar-o kulina sienggipani gimin manderangna talataniko on·angengon, Mendipathar-o railway station dongahani giminsa gong kror 100 ong·gipa food park-ko ia biapo kulina man·enga ine Chief Minister parakataha.
