TURA: India a·songo cholgri me·chikrangni namgnina ma·mong sorkarini ra·gate on·gipa Pradhan Mantri Ujjwala Yojana (PMUY)-ni gnigipa bakko Budbar salo, Meghalaya a·dokni Chief Minister Conrad K Sangma-ni jakchi a·bachengate on·angaha.
Ia PMUY-ni gnigipa bakko a·songni Prime Minister Narendra Modi, ia 2021 bilsini August 10 tariko a·bachengatahachim aro ia scheme-ni gnigipa bako million 10 beneficiary-rangko biming segatdapna nisanko donsoengachim.
Ia PMUY-ni gnigipa bakko Tura-o a·bachengate on·angani somoio a·dokni Chief Minister jinmana aganprakangengon, PMUY-o biming segatgimin manderangna, tangka deposit ka·ani gri connection-ko on·an baksana Oil Marketing Company (OMC)-rangni gita skanggipa LPG refill aro Stove-koba tangka paisa gri indin on·enga ine parakangaha.
Ia PMUY-ara fuel retailer-rangna tangka paisako deposit ka·na nanggija song·a channani gas cylinder-rangko on·enggipa scheme ong·achim aro ia scheme-ni ning·o SC/ST, PMAY, AAY aro uandake onbatsranggipa gadangni me·chikrangkoba man·chapatna gita ia scheme-ko 2018 bilsini April jao sorkari dal·batatahachim.
Ia PMUY scheme-ni ning·o gas cylinder connection-na India sorkarini gita tangka paisarangko dakchake on·enga aro uan kg 14.2 ong·gipa cylinder-na gong 1600 aro kg 5 ong·gipa cylinder-na gong 1150 ong·enga. Cylinder-ni security deposit-na – kg 14.2-na gong 1250 aro kg 5 ong·gipa cylinder-na gong 800 ong·gen aro unbaksana, pressure regulator-na gong 150, LPG hose-na gong 100, Domestic Gas Consumer Card-na gong 25, Inspection/Installation/
Ia PMUY-ni gnigipa bakna dorgastoko galgipa manderangara me·chik ong·na nanggen, BPL nokdango segatgipa ong·na nanggen, dorgasto galgipa bilsi 18 gapgimin ong·na nanggen, bank account nombor aro IFSC code dongna nanggen, dorgastoko galgipa mandeni nokdango gipin LPG connection dongna nangjawa, Aadhar card aro BPL ration card-ko mesokna nanggen aro nokdangni gadangko mesokna KYC dongna nanggen ine official-rang u·iataha.
