Tura MP, ‘mega oil palm cultivation’ project-ni bidingo PM-na sedoa

NEW DELHI: NPP-chi rikdilenggipa a·dok sorkari, ma·mongni manchigimin gita Meghalaya-ona ‘mega oil palm cultivation project’-ko ra·bana nangnikpagenchimoba, Tura-ni MP aro gitcham Union Minister, Smti. Agatha K. Sangma, ua project-ko ra·bajachina jechake Prime Minister Narendra Modi-na sedoatskaaha.
Sangma-ni Prime Minister Narendra Modi-na sedoatgipao ma·mong sorkarini manchigimin gita ‘palm oil farming project’-ko ra·bagenchimode, uan salgro-salaram jolo donggipa skangni bulring-bolgrimko aro bol-wa·arang asolko bon·atna nangao ga·akenga, maina apsan project-ko ra·bagenchimode buringo chatelaigipa bol-wa·arangko bon·ate, sorkarini sualatgnigipa bolrangkosan ge·na-batna nangaignok. Salgro-salaramni a·briarigipa aro a·sal gnangbatgipa jolara jelgijagipa jatrang, chong·motan tribal-rangni a·dok-chigasa ong·ani gimin, jean samtangtango donggipa buring-bolgrimo chatelaigipa bol-wa·arangko bon·na namen simsaksobena nangani ong·enga ine janapaha.
Ia project-ko sokatna gita ma·mongni miksonganiko Chief Minister Conrad Sangma-ni dilachi NPP baksa bakrime rikenggipa sorkariba, project-ara samtangtango donggipa buring-bolgrimrangni bon·anggnina simsakbena nangani gnangoba iani bidingo uamangni namnikpaaniko social media-o parakatmanahachim ine nikna man·aha.
“Ua program-ko namedake ma·siora, uan salgro-salaram jolo aro Andaman Island-rango, jeon a·salrang bang·bea, uandakgipa biaprango ge·atna mikpakma niengachim ine nikna man·a. Ia bolrangni mikkangchi jelbegniko agansona man·ja, haida uan a·jolgimikchi jelroroe buring-bolgrim gimiko gapchipskanaba gnang, jeon buring-bolgrimo pangchake janggi tangenggipa aro da·ororo gimaroroangenggipa do·o matrangni dongchakram biap ba a·tiprangko nosto ka·na ba neng·nikatskanaba gnang,” ine Agatha uni sedoatgipao janapaha.
Kejur bol (Palm tree)-ara salgro-salaram jolni buring bolgrimo chatelaigipa bol ong·ja, uan chi bang·bate salopgipa (nanggipa) gipin a·songni rokkomsa bol ong·a. Uandakgipa bolrangko ge·anichi, jolo donggipa pilak janggi gnanggipa jonturangna aro mande jatna nang·nikaniko sokatnaba gnang, ine NPP-ni dilgipa aro Lok Sabha MP aganengon, uandakgipa bolrangko ge·anichi, a·ningo chini gadangko tang·onatnaba donga ine parakaha.
Sangma-ni parakani gitade, NMEO-OP (National Mission on Edible Oil – Oil Palm) scheme-o pangchake ma·mong sorkarini salgro-salaram jolona ra·bana manchisoenggipa gong kror 11,040-ni project-ara, jelgijagipa a·bri jolo janggi tanggipa manderangni a·dok-chigaode ra·chakna man·jawa ine nikenba, ua salgro-salaram jolni manderangni pal an·tangni ra·chakna amgijaniko parake, ua PM-na sedoatskaaha.