TURA: Garo Hills-ni bang·bata biaprangon rama jal·langrang namsrangjaengahani a·sel ramram manderang re·a doanirango neng·nikanirangko chagrongna nangtokengani gimin Garo Hills-ni dolgni NGO-rang, chong·motan A·chik Association for Protection of Environment (AAPE) aro Niksamso A·chik Society (NAS) dolrang, NPP dolchi dilenggipa MDA sorkariko matnangatenba, Garo Hills-ni rama jal·langrangko ta·raken taridape on·china dabiangaha.
Garo Hills-ni bang·bata rama jal·langrangan namsrangjaengahani gimin an·tangtangni suk ong·gijaniko parakatengon, Tura-oni Mahendraganj-ona dakanggipa rama gita ro·ongrangko salruraengani a·sel manderangni janggirangna kenchakna nangan baksana ia ramarang bilongen nosto ka·ako man·engaha ine dolgni NGO-rang parakataha.
“Mukul Sangma-chi dilanggipa Congress sorkarini somoio ia Ampati rama namani gimin namen mingsing minggamachim indiba da·alo ia ramako an·ching re·ange nigenchimode bang·bata biaprangon a·kolrara dakakosa nikna man·engaha. Ian Congress sorkarini somoio ramako namgija tariahani a·selma ma da·o ia MDA sorkarini rama jal·langrangko taridapna gisiko nanggijani a·selsama?” ine AAPE-ni general secretary Joshua Ch Marak sing·doangenba, ia rama jal·langrangko name rakkina man·na gita nambate kamko ka·china MDA sorkariko didiangaha.
Tura-oni Dalu-ona dakanggipa ramako taria matchotgija donengani gimin suk ong·gijaniko parakatengon, ia ramao MLA-rangni garirangan re·na man·gija dongna nanga ong·ode ramram manderang, chong·motan gari gitcham, cycle, bike aro uandakgipa garirango re·ruraenggipa manderangde maidake salanti re·rurana nangenga, uko pilakan chanchiatna man·a ine dolgni NGO-rang parakataha.
Ia dolgni NGO-rangni parakatani gitade, Damra-oni Mendipathar aro Resubelpara gita Bajengdoba-ona dakanggipa rama, Tura-oni Dalu-ona dakanggipa rama, Baromile-oni Chokpot-ona dakanggipa rama, Nongalbibra-oni Baghmara-ona dakanggipa rama, Asanang-oni Rongsak gita Samanda-ona dakanggipa rama aro Garo Hills-ni dingtang dingtang biaprango iandake namsranggijagipa ramarang bang·en donga aro ia rama jal·langrangko ta·raken taripile on·na nangengachim.
“Garo Hills-o smart city-ko man·na skangba ia rama jal·langrangkon tarichengna nangenga maina rama jal·langrangan namjagenchimode mamingni gitan namroro silroroani dongjawa. Uni gimin ia rama jal·langrangko ta·raken tarie on·china aro Garo Hills-o songdongenggipa manderangni namgnina kamrangko kakketo ka·china sorkariko didienga,” ine NAS-ni general secretary Tengrak Marak parakatskaaha.
