SHILLONG: COVID-19 sabisi sajinmani a·sel Meghalaya a·dokba, a·songni gipin a·dokrang gitan neng·nikaniko chagrongaha, mongsongbate baditaba ja-rangna lockdown ka·ani a·sel a·dokni economy ba tangka paisani obostarangko gimikni gitan namen bilgriataha, unigimin tangka paisao neng·nikanirangko chel·atna gita mingsa special package ba tangka paisachi dakchakataniko am·china gita Meghalaya Governor, Satya Pal Malik, Meghalaya sorkariko didiaha.
Sombar salo koborni manderangna aganengon, A·dok, Ma·mong sorkario mingsa special package-ko dabina nanga aro Ma·mong uako on·na nanga aro iano dakchakaniko on·gen,’’ Satya Pal Malik aganaha.
COVID-19 sabisi sajinmani a·sel, lockdown-rangko ru·ute ong·atna nangani gimin a·dokni manderangni janggi tanganio namen neng·nikaniko ong·ataha aro a·dokni economy namen ja·manchakatako man·aha ine ine Governor aganaha.
Sorkarini, COVID-19 sabisiko dakgrikchakna kam ka·ani bidingoGovernor kusi ong·chakaniko parakaha indiba tikkarangko su·na sorkarini re·chakkatanio manderangni jak on·pagijanina ua suk ong·gijaniko parakaha.
“A·doko bang·a manderang COVID tikkarangko su·na jechaktokenga, ian nama ong·jaenga, tikka su·ana agrede Corona Virus-oni naljokani gipin chol dongja,” ua agandapaha.
Meghalaya sorkari da·oba manderangko tikka su·atna gita jotton ka·beenga aro re·anggipa adita jarangonin manderang tikka su·na gita ong·katbatokenga ineba nikatna man·a.
