TURA: Garo Hills Autonomous District Council (GHADC)-ni budget session-ko kobor ra·enggipa dingtang dingtang media-ni manderangko Budbar pringo napna on·jaha aro iani bidingo dingtang dingtang songbad aro news channel-ni manderang suk ong·gijaniko parakattokaha.
Kobor ra·timgipa manderangni parakatani gitade, Sombar aro Mongolbar salrangode media-ni manderangko maming champengani grian Council-ni session-o napna on·aiahachim indiba bon·kamgipa salode, niamko dingtanggitikatenba, uamangko session-o napna on·jaha.
“Chinga salgnina maming neng·nikani grian GHADC-ni session-o nape koborrangko ra·na man·aha indiba da·alde chingko napna on·gija permission order-ko bi·skaaha. Iandake niam donggenchimode uamang chingna skangan u·iatsona nangachim,” ine kobor ra·timgiparang suk ong·gijaniko paraktokaha.
Iani bidingo GHADC-ni Chairman Rakesh A Sangma-o sing·sandiatskaon, session-ko nina re·baenggipa manderangko mobile phone-rangko ra·bite re·baaniko champengna niamko donatmanaha aro media-ni manderangba Chairman-ni office-oniko permission ra·chenge sakkiko mesokna man·na nanga ine talataniko on·angskaaha.
“Batanggimin somoirango da·o gita session-ni somoirango jera ra·grikanirango maiba ong·gija dakanirangko social media-rango watjojoe roanirangko nikna man·ahani chinga niamrangko dingtangatna nangaha aro uandaken da·ode media-ni manderangba permission ra·chengesa session-rango napna man·gnok. Session-ona re·baenggipa a·palni manderangba mobile phone-rangko ra·napna man·jawaha,” ine GHADC-ni Chairman parakataha.
