TURA: Constitution-ni Sixth Schedule-ko taridapanio A·king Nokmarangna on·gimin bilko pe·ani aro A·chik a·songo ja·rikbaenggipa daka rikanirangko dingtangatna jotton ka·anirang donggenchimode Garo Hills Autonomous District Council (GHADC)-ni MDC-rangba ku·cholsan bakrime ja·kuko de·gen ine MDC-rang tik ka·e donangaha.
Re·anggipa Sombar saloni Budbar salona ong·atanggipa GHADC-ni budget session-o Congress dolni MDC-rang, Sixth Schedule-ko taridapanio village council-ko donanichi A·king Nokmarangna on·gimin bilrangna maming nangchakeani dongna nangja ine GHADC-ni Chairman-na motion-ko on·angahachim.
Iani bidingo GHADC-ni Chief Executive Membor (CEM) Benedic R Marak, aganchakaniko on·angengon, Sixth Schedule-ko taridapna recommend ka·anio Nokmarangna on·gimin bilko taridapani ba komiatani dongjawa aro nanggenchimode iani bidingo MDC-rang ku·cholsan ku·rangko on·gen ine ku·rachakaniko on·angaha.
Session matchotani ja·man, iani bidingo kobor ra·timgiparangna talataniko on·angengon, Sixth Schedule-ko taridapanio Nokmarangna on·gimin bilrangko pe·ani dongjawa ine GHADC-ni CEM, ku·rachakataniko on·aha ine Congress dolni MDC Cherak W Momin aro Williamnagar-ni MDC Alphonsus R Marak parakataha.
Sixth Schedule-ko taridapaniara Garo Hills-o songdongenggipa mande sakantinan namen dal·begipa kam ong·ani gimin Congress dol, iani bidingo Executive Committee-o sing·doaha ineba Congress MDC parakataha.
Iani bidingo Budbar salo, Nokmarangba Garo Hills-ni dingtang dingtang dolrang baksa jinma tom·bimonge chanchirimangahachim aro Nokmarangna on·gimin bilrango maming nangchakeani dongjana gita dabianirangko dakangtokahachim.
