Niamgri challaienggipa coke factory-ni kosako bichal ka·gen: Conrad

Shillong: East Jaintia Hills a·jani Elaka Sutnga-ni wilwilao niam gri challaienggipa coke factory (koelako so·e tarienggipa karkanarang) dongode a·dok sorkari uarangni kosako bichal ka·gen ine Chief Minister, Conrad K Sangma mejal Sombar salo ku·rachake ra·angaha.
Chief Minister-ni mejalo ia kattarangko agananiara, a·jao ba Elaka Sutnga jolo niam gri challaienggipa coke factory-rangko sal bongani gisepon chipatchina ine Environment Coordination Committee (ECC)-ni mejalo hukum on·atani ja·manosa ong·aha.
Sangma-ni parakani gitade, a·dok sorkari iandakgipa karkanarangko saoba a·jao niam gri challaiengako nikenba sorkarina u·iatgenchimode a·dok sorkari uandakgipa kamna kusi ong·begen aro karkanako challaienggiparangni kosako bichalona rimbaskagen ine aganaha.
“Niamko ja·rikgija ba pilak nangchapgipa department-rangni NOC, CTE ba CTO-rang aro Single Window Agency (SWA)-ni nangchongmotgipa lekka-patrorang donggija challaienggipa coke plant-rangni kosako ja·ku de·na gita chinga nichae dongjawa,” ineba ua agandapaha.
Uni agan-janapani gita, a·dokni dingtang dingtang a·ja ba jolrango niamo pangchake challaienggipa karkanarangni kosako ja·kurangko de·na sorkari bil dongja, maina uamang, a·a nokgiparangni nangchongmotgipa lekka-patrorang aro gipin nangchapgipa hukumrangko man·ahachim.
“Iandakgipa niamrangko ja·rike challaienggipa karkanarangko rim·e bichal ka·na ba chipatna nanggenchimode, sorkariba dal·a gualani ong·skagen. Niamo pangchake bading-chiwalenggipa aro karkanarangko challaienggiparangko chipatode, uan sorkarini gualaniko mesokskagen,” ineba Sangma parakaha.