SHILLONG: A·doko chalaienggipa coke factory-rangni bidingo namedake sandie nina gita Meghalaya sorkari, u·i-ma·sigipa manderangko rimchapenba dolsa technical Committee-ko songgen.
Coke factory-rangni ong·katgipa wal·kurangni gimin songni-nokni manderang jegalenga ine Assembly-ni zero hour-o Opposition chief whip, PT Sawkmie-ni naatgipa kattani bidingo aganchakengon, environment-ko chel·chakani, manderangni an·seng-baljokani ugita gipinrangni bidingo sandienba ku·pattianiko on·nagipa dolsa technical committee-ko department songgen ine Forest aro Environment Minister, James Sangma aganaha.
Unaskang Minister indakeba aganaha je coke factory-rang bilsio 25,000 metric ton-na baten komibate coke-rangko bikotengani gimin ian Environmental Impact Assessment notification 2006-ni ning·ode ga·akeja, jeon Environmental Impact Assessment Environmental Management plan nangchongmotgipa ong·achim, factory-rangni wilwilaogipa balwarangko name rakkiani bidingo State Pollution Control Board, da·sikkarion niamrangko ra·gate on·aha.
East Jaintia Hills-o donggipa coke plant-rangni bidingo aganengon, Single Window Agency, district-o dam 48 coke plant-rangnade kulina on·aha aro department-rangni permission ba bil on·ani gride ia project-rangko jako ra·jachina gitaba Single Window Agency-an talatanikoba on·ahachim ineba Pa Sangma aganaha.
Minister-ni aganani gitade, State pollution control board, district-o dam 13 coke plant-rangna kulina gita bilko on·aha aro ge 9 unit-rangnaba cholko on·aha, unomitingo niamgri chalaienggipa dam 30 coke factory-rangkoba Board rim·a man·aha, jeon Water Act, 1974-ni section 25 aro Air Act 1981-ni section 21-ko pe·aha ine ia unit-rangko chipatchina gitaba u·iatanikoba on·manaha, Pa Sangma aganaha.
East Jaintia Hills-ni District Administration, re·anggipa July jao pollution control board baksa biapon re·ange nieani ja·mano, CTO-ko man·gijagipa pilak coke plant-rangkon chiptokchina gita u·iataniko on·manahachim.
“Manderangni namgnina ia coke plant-rangko changsanon pilakkon chipgopatchina chinga dabia” ineba Sawkmie agana.
