Chief Minister, Khadi Plaza-na pangchakaniko songa  

Shillong: Chief Minister, Conrad K Sangma, Meghalaya Khadi and Village Industries Board (MKVIB)-ni Chairman Gavin Mylliem-ni dongpaanio Mongolbar salo Shillong Barik-o Khadi/Market Complex-ko rikna pangchakani ro·ongko songe on·aha.
Indake tom·anio bak ra·e aganprakmitingo Chief Minister Conrad K Sangma indine aganaha, “Meghalaya sorkari, pangnan nano aro micro entrepreneur-rang aro artisan-rangko ra·dona ba tang·doatna jotton ka·ronga.”
“Studio, emporium dongja baksana commercial urban market dongjani a·sel entrepreneur aro artisan-rang uamangni changa-sapaniko chu·sokgipa biapona sokatna cholko man·ja ian dal·begipa neng·nikani ong·a. Uamangni changa-sapanina market donggenchimobe a·dokona sokbagipa tourist-rangna jolo tarigipa bosturangko palna-simna gita choko on·gen.”
Minggipin buildingko rikanioba a·doko man·gipa ba tarigipa bosturangko jakkale dingtangmancha rikna man·gen. Ia Khadi Plaza-ra game cha·gipa aro artisan-rangna uamangni bikotgipa ba tarigipa bosturangko jinmana mikkangona sokatna nambegipa biap ong·gen, ineba CM agandapaha.
Indake ong·engon MKVIB-ni Chairman Gavin Mylliem-ba indine aganaha, “Khadi market complex-ko matchotna man·ahaode, uan board-na revenue ba kajinako chimonganio dal·bea dakchakani ong·gen. Aro ia project-ara NEC, Department of Commerce and Industries, MIDC aro MKVIB-ni jotton ka·ani bite ong·a.”
Ia project-na NEC, 2,73,76,685.00 tangkako on·aha, aro Implementing Agency-ara MIDC Ltd. ong·skaa. Building-ko RCC frame type structure G+3 story building-o rikna tik ka·aha. Jeon Handicraft, bicha bitchi aro dingtang dingtang cha·anirang, bigilni bosturang, cosmetic, ba·ra-chola, meka bolni tarigipa budu, ampatchi aro blacksmith ba silni bosturangko tarigiparang donggen.
Uandake pangchakani ro·ongko songna tom·anio Economic Advisor, Banking and Industries, NEC aro MKVIB-ni Chief Executive Officer-rangba bakko ra·tokaha.