RESUBELPARA: Adita salrangna skang, North Garo Hills a·jani Resubelpara BJN Hall-o District Commerce & Industries Centre (DCIC)-ni gita program-ko ong·atangenba, sorkarini on·enggipa dingtang dingtang scheme-rangchi an·tangtangna janggi tangani cholrangko dake ra·china gita jolo songdongenggipa chadamberangko didiangaha.
Sorkarini ra·gate on·gipa dingtang dingtang scheme-rangni bidingo manderangna agan-talate on·na gita awareness program-ko ong·atanio Resubelpara C&RD Block-ni BDO Rojalinda D Shira, mongsonggipa sokgipa ong·e jinmana aganprakangengon, sorkarini ra·gatgipa scheme-rangni bidingo ma·siate on·anichi chadamberangna janggi tangani cholrangko on·na gitasa iandakgipa program-rangko ong·atenga ine parakangaha.
Jolo namroro silroroaniko ra·bana aro chadamberangna janggi tangani cholrangko on·na gita kamrangko ka·engani gimin DCIC-ko mittelpilangengon, ia department, training-rangkosan on·aigija, tang·dobaenggipa bading chiwalgiparangna loan aro uandakgipa dakchakanirangko on·e uamangni kamrangko namdapatna dakchakenga ine Shira parakataha.
“Bading chiwale cha·gipa manderang bang·batan tangka paisani gita aro dingtang dingtang neng·nikanirangko man·rongani a·selan an·tangtangni bading chiwalani kamrangko a·bachengna man·chiprongja indiba dingtang dingtang department-rangni dakchakanichi da·o uamang an·tangtangni kamrangko tang·doatna cholrangko man·engaha,” ine Shira aganenba, sorkarini on·enggipa scheme-rangko ra·e an·tangtangna janggi tangani cholrangko dake ra·china, jolni chadamberangko didiataha.
C&RD department-ni ning·o ra·gatgipa dingtang dingtang program-rangni giminba ua ia tom·anio jinmana agan-talate on·angaha.
Ia program-ko ong·atanio dingtang dingtang scheme-rangni gimin agan-talate on·anggipa gipin manderangara, DCIC-ni General Manager IZ Wreang, DCIC-ni Functional Manager Nethaji Marak, Resubelpara Block-ni IPO AD Shira aro APO Mike Henchard Momin ong·a.