TURA: South Garo Hills a·jani Captain Williamson Memorial Government College-o COVID-19-ni tika su·kugijagipa chatro chatrirangko class-rango napna on·jaenga inenba Mongolbar salo, Constitutional Rights Forum-ni dilanichi bang·bea chatro chatrirang, college a·palo jegalanirangko dakangtokaha.
Ia college-o tika su·kugijagipa sak 97 chatro chatrirangko offline class-rango dongpana on·jaenga ine badi ka·aniko man·soani ja·man Constitutional Rights Forum-ni dilanichi, chatro chatrirang Mongolbar salo jinma jegalanirangko dakangaha.
COVID-ni tikako su·aniara nangchongmota ong·ja aro an·tangtangni skani gitasa ong·na nanga ine janapatengon, iandake tika su·kugijagipa chatro chatrirangko class-rango dongna on·gijaniara chatro chatrirangna on·gimin bilko pe·ani ong·enga ine chatro chatrirang parakataha.
Iani bidingo Constutional Rights Forum-ni gita dingtangmancha South Garo Hills a·jani Deputy Commissioner-na seachiba badi ka·doangaha aro college-ko dilenggipa manderangni kosako nanga gita ja·kurangko de·china dabiangaha.
“Tika su·aniara an·tangtangni skani gitasa ong·na nanga ine Supreme Court-an raiko on·manaha. Da·o dipet tika su·gimin aro su·kugijagiparangko class-rango napna on·ani bidingo sorkarini gitaba maming niamrangko on·na dongkujachim indiba ia college-o tika su·kugijagipa chatro chatrirangko class-rango napna on·gijaniara niamni a·palo ong·enga,” ine Constitutional Rights Forum-ni dilgipa Greneth M Sangma parakataha.
Baghmara-o tika su·kugijagipa chatro chatrirangko class-rango napna on·jaenga ine jegalgrima
Date:
Share post:
