TURA: Bus gari a·sel ong·anio janggirangko gimaatna nange aro saknaanirangko man·e duko ga·akenggipa pilak nokdangrangna nanga gita compensation-ko gamskachina A·chik Holistic Awakening Movement (AHAM), a·dok sorkario dabiangaha.
Budbar walo, Williamnagar aro Tura-oni Shillong-ona re·angenggipa MTC bus gari bolsa, Nongchram dolongko su·gakani ja·man Ringdi chiringona ga·akonange a·sel ong·ahachim aro ia a·sel ong·anio sakdok manderang so·otako man·an baksana sak 16 manderang bilongbee saknaanirangko man·na nangtokahachim.
Indake ong·engon, MTC bus garirangko salgiparang pangnan iandake simsakgija aro nangana bate ta·rakdugae salrongengani a·sel dosgri janggirangsa gimana nangenga ine AHAM parakatenba, ia a·sel ong·anio sianggipa aro saknaa man·gipa pilaknan nanga gita tangka paisarangko gamchina sorkariko didiataha.
“Accident-de je somoioba je biapoba ong·na man·aia beben, indiba gariko saltimgiparangni simsakgija salani a·sel bang·a somoirangon manderang, an·tangtangni ka·sagiminrangko gimaatna nangao ga·akenga,” ine AHAM-ni vice president Georgeprince Cheran parakatenba, mikkangchide bus gari salgiparangna rakgipa niamrangko donchina gita sorkariko didiangaha.
COVID-19 sabisiko chel·chakna dongimin niamrang dongani gimin pa·sike damrangko bate ra·enga indiba gario manderangkode skango gitan gape salenga ineba AHAM, suk ong·gijaniko parakataha.
Manderangko salruragipa garirang, jekai bus, sumo, auto, maxi taxi aro uandakgipa garirangko salgipa manderang bang·bata somoirangon churangko ringesa salrongenga ineba AHAM-ni vice president matnangataha aro iandake chu ringe salgiparangko mikrakbate nirok sandichina aro rim·a man·ode rakbatgipa sastirangko on·china dabiangaha.
