TURA: Sukrobar salo, a·dokni Chief Minister Conrad K Sangma, North Garo Hills a·jani A·dokgre jolo donggipa dingtang dingtang producers group-rang baksa tom·aniko ong·atangenba, ja·mano ia jolo donggipa dol 35 producers group-rangna FOCUS program-ni ning·o gimik gong lak 31.15-ni cheque-rangko suale on·angaha.
Ia Farmers’ Collectivisation for Upscaling Production & Marketing Systems (FOCUS) program-ara game ge·e cha·giparangko ku·cholsan ong·ate ‘Producers Group’-rangko kulienba tangka paisani gita dakchake on·na Meghalaya Basin Management Authority (MBDA) baksa sorkarini nangrime ra·gatgipa program ong·achim ine nikna man·a.
Batanggimin somoirangoba ia apsan program-ni ning·on ua, a·dokni dingtang dingtang biaprangona re·ange game ge·e cha·giparang aro bading chiwalgiparang baksa agangrike, sorkarini on·enggipa dakchakanirangko man·na gita ku·cholsan nangrime ‘producers group’-rangko bikotchina didiengachim ine nikna man·a.
A·dokgre-o game ge·e cha·giparang aro dingtang dingtang producers group-rang baksa tom·anio a·dokni Chief Minister, jinmana aganprakangengon, gama ge·anirango chu·sokna aro an·tangtangni janggi tangani gadangko namdapatna man·na gita game ge·e cha·enggipa manderangko, dingtang dingtang producers group-rang baksa bakrimchina didiangaha.
Ia FOCUS program-chi a·dok sorkari, game ge·e cha·enggiparangni dingtang dingtang neng·nikanirangko namatna man·gen ineba Chief Minister aganaha.
Meghalaya a·doko songdongenggipa manderangoni bang·batan gama ge·anio pangchake janggi tanggiparangsa ong·ani gimin a·dok sorkari, game ge·e cha·enggipa manderang namgnirangko man·china gitasa ia program-ko a·bachengataha ineba Sangma aganaha.
Ja·mano ua dingtang dingtang producers group-rangni neng·nikanirangko ma·sie ra·na gita mikkanggrikeba agangrikangaha.
