SHILLONG: Re·anggipa Bristibar pringwalo Turaoni Shillongona songrebagipa MTC bus gari a·sel ong·anio sianggiparangna aro saknaa man·giparangna gampilaniko dakna gita parakataha.
A·sel ong·ani sianggiparangna sakprakna Gong laksa ex-gratia-ko on·na gita aroba mata bu·a man·e sana bananiko dakenggiparangna sakprakna Gong hajal sotbongako on·gen ine Meghalaya Transport Corporation (MTC) Chairman Jim M Sangma parakataha.
Mijalo Corporation-ni gita rang·gitik tom·e chanchianiko dakanio iarangni bidingo chanchie tik ka·aha aro a·sel ong·aniko department-ni gita sandirokatna gitaba tik ka·aha, je a·sel ong·anio sakchet manderang uamangni janggirangko gimaataha aroba bang·an mata-bu·a man·tokaha.
Indake ong·engon, duko ga·akgipa nokdangni manderangnaba Sangma, uni kalimpaani kattarangkoba paraka.
