SHILLONG: Re·baenggipa 2023 bilsini Assembly election-oba National People’s Party (NPP) chegipa ong·e sorkariko rikpiltaigen ine Jowai-ni NPP MLA Wailadmiki Shylla, an·tangni ka·dongsoenganiko parakataha.
“2023 bilsini Assembly election-oba NPP chepiltaigen ine anga namen ka·dongenga. Meghalaya Pradesh Congress Committee-ni gital president Vincent Pala-ba election-rango NPP baksa susana amchakjawa,” ine Shylla, Robibar salo aganaha.
MPCC-ni gital president Vincent Pala-ba Jaintia Hills-onin ong·achim aro ua da·o Shillong-ni Lok Sabha MP ong·engachim.
2018 bilsini Assembly election-ni gimin janapatengon, ua somoioba Congress dol, Jaintia Hills-o seat ge·sakosan chena man·aiahachim ine Jowai-ni MLA aganaha.
“Da·o Vincent Pala, MPCC-ni president ong·ahaoba maming dingtanganirang dongjawa aro Congress dol, Jaintia Hills-o chena man·jawa,” ine Shylla aganaha.
2023 bilsini Meghalaya Assembly election-o susana miksonganirang dongja aro ua Delhi-on MP ong·e dongna nangnikbataia ine Sonibar salosan MPCC-ni president Pala aganahachim.
Jaintia Hills-ni NPP membor-rang Congress dolchi katskanaba gnang ine agananikoba Jowai-ni NPP MLA raken jegalataha aro da·o dipet Jaintia Hills-o NPP-ni pilak membor-rangan doltango kusi ong·e dongtokenga ine parakataha.
“Chinga doltangko wate katna miksonganirang dongja aro NPP-ni membor-rang pilakan iano kusi ong·e dongtokenga,” ine Shylla aganaha.
Joltangni manderangna maming kamrangko ka·jaenga ine matnanganirangna aganchakaniko on·angengon, ua batanggimin somoirango bang·a kamrangkon ka·aha aro mikkang jarangoba manderang uni kamrangko bang·en nikangkuna man·gen ine Shylla parakataha.
“Namroro silroroani kamrango anga an·tangni kamko ma·sia aro re·baenggipa jarangoba manderang ia kamrangko nikna man·kugen. Chingni kamrang da·osa bite nangna a·bachenggnok,” ine Jowai MLA aganaha.
