SHILLONG: Sombar attamchibara Shillong songjinmani Lower Lachumiere-o donggipa National People’s Party (NPP) office-ni gate sambaoniko Improvised Explosive Device (IED) boma gnang jolonggako man·aha.
Police-rangni u·iatani gitade, ja·mano ia biapona Bomb squad-ni sipairang re·baenba IED bomako ra·angaha aro da·o ia bomako donanggipani bidingo am·sandianirangko dakenga.
Ia IED bomako man·ani ja·man Hynniewtrep National Liberation Council (HNLC) bobil dol, ia bomako donangani bidingo a·kangatskaaha. HNLC bobil dolni publicity secretary Sainkupar Nongtraw, ia bomako HNLC-ni manderang donangaha ine Facebook-o jinmana parakataha.
NPP dilgiparangni u·iatani gitade, ia jolonggako uamangko Sombar attamchibara 2:30 bajimango nikani ja·man police-rangna u·iataha aro ja·mano police-rang ua biapona re·baenba, ia biapko chipe donataha.
Ia biapo IED bomako man·ani ja·man ia jolo songdongenggipa manderangko chel·e dongchina u·iataha aro ia jolrango donggipa office aro dokkanrangkoba chipe donattokaha.
Indake ong·genchimoba, ia IED boma gopretna skangan Bomb squad-ni manderang, ia bomako kimitna gita man·aha.
