SHILLONG: Re·anggipa Sombar salo Hynniewtrep National Liberation Council (HNLC) bobil dolni National People’s Party (NPP)-ni dilgiparangna ka·mikkenataniko on·aniara politics-ni gitaba ong·engnaba gnang ine Mongolbar salo, NPP-ni national president aro Meghalaya a·dokni Chief Minister Conrad K Sangma parakataha.
“MDC Lamphrang Blah-ni NPP-o napna salsa skangsa aro by-election sambamitingosa NPP-ni dilgiparangna ka·mikkenataniko on·aha. Uni gimin ian politics-ni gitaba ong·naba gnang indiba chinga ia pilakkon name nienga,” ine Mawphlang-o Lamphrang Blah-ko NPP-ona rimchaksona gita tom·aniko ong·atani ja·man Sangma aganaha.
Sombar salo, Shillong songjinmani Lachumiere-o donggipa NPP office sambao IED bomako man·ani ja·man HNLC bobil dol, ia bomako donanganio jak donga ine a·kangatenba, jasani gisepon NPP-na kam ka·giparangko NPP-oni ong·katchina aro NPP-o napna miksongenggiparangkoba napjachina gita mikrakataniko on·angahachim.
“NPP dolni bilakbaroroengako nikesa uamang (HNLC) kenengama? Indiba iandake ka·mikkenatanirangara NPP-ni manderangko bil gnange kam ka·aoniko champengna man·jawa,” ine Sangma parakataha.
Re·baenggipa October-ni 30 tariko ong·atenggipa by-election-rango NPP chegipa ong·aigen ine parakatengon, iandake ka·mikkenatanirangna kenjachina aro ka·donge kamko ka·china gita NPP-na kam ka·giparangko aro dilgiparangko NPP-ni national president didiataha.
NPP office sambao boma man·gipani bidingo am·sandie nanga gita ja·kurangko de·china a·dokni police-rangna ge·etaniko on·manaha ineba Chief Minister parakataha.