NONGPOH: Ru·uta sal somairangna dondipchenggipa sima-arini mamlako namatna miksonge, Meghalaya sorkari Regional Committee-rangko songaha aro Assam nangrime mijal Sonibar salo skanggipa bako Khanapara aro Pilangkata jolrangko re·ange nieaha, jeon Barapathar, Mawiong, Iongkhuli, Maikhuli, Pilangkata A, Pilangkata B, Patharkuchi, Pahamkynshoh songrang aro Ribhoi District-o Khanapara man·chapa.
Meghalya-chipakni Regional Committee-ko skotong ong·e Deputy Chief Minister, Prestone Tynsong Chairman ong·e dilangaha aro un baksa MLA-rang-Jirang-oni, Sosthenes Sohtun, Nongpoh, Mayralborn Syiem, Mawhati, Dasakhiatbha Lamare, Ri Bhoi District Administration-ni officer-rang re·angpaaha aro Assam-oni skotonggipa committee-ko Water Resources-ni Minister, Pijush Hazarika Chairman ong·e, Dispur-oni legislator, Atul Bora-maang dilangaha, aro Kamrup Metro-oni aro District Administration official-rang aro gipinrang dongpaaha.
Uamangni re·ange nieao uamang Assam ba Meghalaya-o songdongna sika uamangni agan-chanchianirangko knana committee songdonggiparang baksa agangrikaha indiba Iongkhuli aro Maikhuli songni A·chik dilgiparang jemangan uamangni gisik ra·gija somainin an·tangtangko Meghalaya-ni ine a·kange Assam-chi napatna am·ako raken jegalaha aro adita a·bri jat ong·gijagipa manderangni aganao pangchake ua a·arangko Assam-na on·atjawa ine aganaha.
A·dok damgnini Regional Committee-rangni re·ange niegipa sima-ari a·jolrango A·chik songdonggiparangoni me·chikrangni dilgipa Ringkumoni Marak aroba Iongkhuli songni headman, ia a·jolrang chu·gimik Meghalaya-ni ning·o ong·a aro uamang mamingdakeba ia a·ako ra·angna on·jawa ine aganaha. A·jolgimikan Meghalaya-ni ning·o ong·achim, uamangni chongmitingonin aro ia somaio tarigipa ramako jakkale sima-ariko bak dakna sing·ani katta dongja, uamang agantaiaha.
Indake ong·engon, ru·utbea sal somairangna donchipenggipa sima-ariko namatna Chief Minister gadangni gita agangrike ku·rachakaha, Assam aro Meghalaya a·dok damgnian sima-ari golmalko nieani ja·mano Prestone Tynsong aro Pijush Hazarika koboro aganao a·dok damgnini gisepo ua a·jolrango dingtangrikani donganio jolni songdonggiparangni agananirangko knana a·dok damgnian nie mamlako namatna committe-ko songaha ine uamang aganaha.
Mai obosta ong·a ia committee-rang jekoba chanchijawa aro golmalni pilak mamlarangko janape ra·chakani ja·mano ra·chakgimin aro on·gimin report-o pangchake a·dok damgnini Chief Minister-rang apsan chanchianiko ra·gen indake a·dok damgnini manderangni gisepo maming jajaani dongjawa, uamang u·iataha.
