SHILLONG: Health Minister James PK Sangma-ni ka·donge a·kangatani gitade Shillong aro Tura-o rikenggipa medical college-rangko ta·rakbate matchotna gita mikpakma nibatenga.
“Health department-ko daito ra·ani ja·man da·o anga chanchianirangko mikkangchi nambataona ra·angenga. Anga dingtangmancha Shillong aro Tura-o rikenggipa medical college-rangko mikpakma nibatenga,” ine Sangma aganaha.
Shillong Medical College-ni bidingo kobor ra·o Sangma-ni aganani gitade bang·a lekk-panjani kamrangko matchotna gita nangkuenga, indakmitingo neng·nikanirangko man·genchimoba Tura-ode Medical College-ko rikna a·bachengaha. “Anga project-rangko salantian nirokenga jedakode an·ching ta·rakbate sanna-banani hospital-rangko a·dokni manderang jakkalna gita chol man·gen,” ineba ua agandapaha.
Project-ko ta·rake matchotatchina gita sinjeto somoi gita matchotatna amgenma ine sing·anina Sangma-ni aganchakani gitade,”Ian gital dake sinjetaniko man·ani gimin ong·ja. Department-o kam ka·enggiparang project-ko matchotatna gita apsandake raken kamrangko ka·enga.”
New Shillong, Umsawli-o Shillong Medical College aro Hospital-ko rikna manchigipa biapko da·o dipet corona care centra dake jakkalenga.
Covid-19 sajinma sabisini bidingo Health minister-ni jajrenge parakatani gitade a·doko ia jao ong·atnasienggipa by-elections aro manina am·enggipa Durga Puja-rang namen mikkangchi an·ching neng·nikaniko man·naba donga. Indiba, a·doko obostarangko chagronggenchimoba uarangko mikkangchakna gita namen tarisamsoengaha ine ua ka·donge aganaha.
“Chinga sabisini bidingo namen simsaksoenga, indiba ia re·baenggipa maniao mitam bebera·giparangna gisik saani ong·naba donga ine chanchie chinga simsake aro sakanti bebera·gipako mande ra·esa kamrangko ka·na nanggen. Chinga manianiko dakmitingo simsakatna nanggen apsandake manianiko kusi ong·e dakchina gita manderangna cholko on·gen,” ine Sangma aganaha.
Da·o dipet sanna-bananio nangchongmotgiparang aro samrangni bidingo Health Minister-ni aganani gitade, “Chinga nambataona ka·dongenga aro namjabatgipa obostarangnaba tarisamsoenga ine pangnan anga aganronga.”
“Gimikan chu·ongaha ine chinga agangenchimode chu·ongaha ine rasong daka gita changen, indiba chinga rasong dakna nangnikja. Chinga namedake simsak-nirokaniko dakna gita skenga aro salanti gimikkon nirokna gita kam ka·enga,” ine ua agandapaha.
Bristibar salo, Union Health Ministry, October, November aro December jarango Covid sabisini barianina mikrakataha indake dambong a·dokrangko mikrake dongchina gita ge·etataha. Ge·etatanio Meghalaya a·dokba bak dongpaaha.
Ministry-ni mikrakatgipa dambonga a·dokrangara — Meghalaya, Mizoram, Kerala, Sikkim aro Manipur-rangni antini positivity rate 5 percent badee dongenga.
