TURA: A·gilsak baksa susaanio bak ra·pae Don Bosco College, Tura-ni Department of Physics, da·ororoni mingsingenggipa katta bichong “Digital Transformation: Limitless Possibilities” ba digital-ni gita dingtangroroani aro ari gri cholrang uno dongani bidingo ia bilsini October 7 tariko DBCTE Seminar Hall-o ong·atangaha.
Ia programme-ko IQAC aro College-ni Alumni Association-rang bakrime ong·ataha. Programme-ona mongsonggipa ong·e re·bae college-ni gitcham chatro, Bangalore APAC Ericsson-ni Head-Business, Abhijit Dutta agan-ku·pattieaha. Indake, ia programme-o college-o poraienggipa science stream-ni sak 150 chatro-chatrirang aro skigiparang bakko ra·tokaha.
Poonam Rai, 5th semester-ni physics-ko poraienggipa chatri ia programmeko a·bachengataha. Uni ja·mano programme-ona sokgipa ong·e re·bagiparangko college-ni IQAC Coordinator, Dr. Arindam Ghosh rimchaksoani kattarangko aganaha. College-o programme-ko sokachaksogipa aro college-ni principal Fr. Vivan R. Mukhim digital-ni gita dingtangroroaniko nangnikani bidingo didianiko dakangaha.
Unbaksana, maidake digital world ba a·gilsako digital-ni gita Covid tikka su·anio dakchakanirangko on·aha ine an·tangni cha·totanirangko Don Bosco College Alumni Association-ni Secretary aro West Garo Hills, DMCHO Dr. Ivonne M Sangma aganaha. Covid tikkako su·e ra·tokchina gitaba ua didie aganangaha.
Katta bichongna kragipa git ga·subegipako B.Sc 3rd Semester-ni chatro Baxter Marak jinmani mikkango ring·mesokaniko dakangaha.
Programme-ona mongsonggipa ong·e sokgipani bidingo DBC, Tura-ni Physics HOD Mahidhar Rajbhongshi jinmana talate on·aha.
Programme-ona mongsonggipa gamchatgipa ong·e sokgipa Abhijit Dutta, katta bichongni bidingo bang·gija talataniko dakaha. Unbaksana, dingtang dingtang multinational company-rango bilsi 17-na kam ka·anio cha·totgiparangko jinmana parake aganaha. Unbaksana uni aganani gita, da·ororo 70 percent company-rang engineeering poraigijagipa chatro-chatrirangko kamna rimnapenga, uni gimin man·a dipetde science-ni mongsonggipa ja·pang-ja·dil basic science-ko poraianiko dakkubo ine chatro-chatrirangko didie aganaha. Ia interactive session ba golpogrikaniko Dr. Yubaraj Sharma dakdilaha.
Interaction session ba mongsonggipa gamchatgipa ong·e sokgipa baksa kontasa atarangna kingking golgogrikaha, indake golpogrikanio adita chatro-chatrirang an·tangtangni ma·sina skaniko uo sing·doaha.
Bon·kame programme-o matchotatani kattarangko DBC-ni SWA President aro B.Sc 5th Semester-ni chatro Bulbul G. Momin agane matchotaha.
