SHILLONG: Re·baenggipa October-ni 30 tariko ong·atenggipa Mawphlang Assembly constituency-ni by-election-o Hill State People’s Democratic Party (HSPDP) dolba, United Democratic Party (UDP)-ni candidate Eugeneson Lyngdoh-na chakpaaniko on·gen ine Mongolbar salo parakataha.
HSPDP aro UDP dolgnian Regional Democratic Alliance (RDA)-o bakrimenggipa dolrang ong·achim aro ia dolgnian NPP-chi dilenggipa Meghalaya Democratic Alliance (MDA) sorkariniba bak ong·engachim.
Indake ong·engon, Mongolbar salo HSPDP-ni dilgiparang tom·aniko ong·atangenba, Mawphlang bye-election-o UDP-ni candidate-na kamko ka·na gita tik ka·angaha ine HSPDP-ni president KP Pangniang, Mongolbar salo parakataha.
Pangniang-ni parakatani gitade, Mawphlang by-election-o HSPDP dolba UDP-ni candidate-nan kamko ka·na tik ka·manahani gimin ia by-election-na kamrangko ka·rimna gita UDP baksa apsan chanchirimna nangenga ineba ia tom·anio HSPDP-ni dilgiparang tik ka·angaha.
Indake ong·engon, re·baenggipa bilsio Meghalaya a·dokni bilsi 50 gapaniko manina siengani gimin a·dokni jakgitelanina kam ka·dilgipa dolni dilgiparangna dingtangmancha re·baenggipa November 10 tariko mande ra·pilskaaniko dakna gitaba ia tom·anio tik ka·angaha ine HSPDP-ni president parakataha.
