NEHU Tura campus-ni PVC-na Tribal-ko songchina AGHJAC dabia

TURA: Tribal professor-rangoniba pro-vice chancellor-ni kamna poraiani gadang chu·onggiparang bang·en donga ine All Garo Hills Joint Action Committee (AGHJAC) parakatenba, North Eastern Hill University (NEHU) Tura campus-ni Pro Vice Chancellor-na Tribal professor-rangoni saksako songskachina gita dabiangaha.
Iani bidingo Shillong-o donggipa NEHU-ni Chancellor-na sedoatengon, Tribal-skarangsan Tribal-skani neng·nikanirangko aro ia jolrango ong·enggipa obostarangko ma·sichakna ama ine AGHJAC parakatenba, NEHU Tura campus-na Tribal professor-rangoni saksako Pro Vice Chancellor songgenchimode NEHU Tura campus-ko nambate chalaiangan baksana Tribal chatro chatrirangnaba nambatgenchim ine parakataha.
“Skanggipa chinga ia nambegipa university-ko Meghalaya a·doko kuliahani gimin mittelpilaniko on·chengna ska maina ia NEHU-ko kulianichi a·doko bang·a manderangan dingtang dingtang ramarango chu·sokgipa ong·pana man·aha. A·doko namroro silroroan baksana ia university-oniba bang·en skia man·gipa manderang ong·katengaha aro ia manderangan da·o a·dokna dangdike on·skaengaha. Indake ong·genchimoba, ia jolrango Tribal chatro chatrirangsa poraigiparang bang·bata aro ia jolrango ong·enggipa obostarangkode Tribal-skarangsa ma·sibata,” ine AGHJAC-ni convenor Balkarin Ch Marak parakatenba, ia pilakni gitan nigopate ia NEHU Tura campus-na Tribal PVC-ko nangchongmotenga ine dabiangaha.